იყო პოზიტიური და ნაყოფიერი შეხვედრა – სოსო ტყემალაძე „ბორჯღალოსნებს“ შეხვდა

საქართველოს რაგბის კავშირის პრეზიდენტი სოსო ტყემალაძე დღეს საქართველოს მორაგბეთა ნაკრებს შეხვდა და სამომავლო გეგმები გააცნო.

ტყემალაძესთან შეხვედრის შესახებ „ბორჯღალოსნების“ კაპიტანმა და მთავარმა მწვრთნელმა „რუსთავი 2“-ის ეთერში, გადაცემა „სპორტის საათში“ სტუმრობისას ისაუბრეს.

„სოსო ტყემალაძე გაგვეცნო ყველას, გაგვაცნო თავისი ხედვა, ვისაუბრეთ ნაკრების სამომავლო გეგმებზე და განვლილ პერიოდზე. მოგვილოცა რუსეთის ნაკრებთან გამარჯვება და მომდევნო თამაშებისთვის წარმატება გვისურვა. იმედი გვაქვს, რომ მომავალი იქნება ნათელი და ყველა ერთად შევუდგებით რაგბის განვითარებას“, – განაცხადა მერაბ შარიქაძემ.

„ბატონი სოსო თავისი შემართებით, ენთუზიაზმით და ენერგიით ჩემთვის საკმაოდ ნაცნობია. მისი შეხვედრა ნაკრებთან იყო აბსოლუტურად პოზიტიური და ნაყოფიერი, დანარჩენს დრო გვაჩვენებს. მე ეჭვიც არ მეპარება, რომ მალე თვალშისაცემი იქნება ის გეგმები, რაც მას აქვს. ეჭვიც არ მეპარება, რომ ყველაფერი ძალიან კარგად იქნება“, – აღნიშნა ლევან მაისაშვილმა.