რაგბი ევროპის ჩემპიონატის მესამე ტურში საქართველოს მორაგბეთა ნაკრები კალინინგრადში რუსეთის ნაკრებს შეხვდა და ზედიზედ მეოცედ, ისტორიაში კი ოცდამესამედ დაამარცხა.
ბორჯღალოსნებმა სათამაშო უპირატესობა საწყის წუთებშივე მოიპოვეს. ანგარიში მატჩის დებიუტშივე თედო აბჟანდაძემ გახსნა, რომელმაც საჯარიმო დარტყმა ზუსტად გამოიყენა.
რამდენიმე წუთში მანვე კიდევ ერთი ჯარიმა შეასრულა ზუსტად და საქართველოს ნაკრები 0:6 დააწინაურა.
ზუსტად 15 წუთში კალინინგრადის სტადიონზე შეკრებილმა მაყურებელმა პირველი ლელო იხილა. 36-ე წუთზე ბორჯღალოსნებმა დერეფრიდან მოლი შეკრეს, გამოტანილი ბურთი კი კარგად გადმოშალეს მარჯვენა ფლანგისკენ და საბოლოოდ ეპიზოდი ლელოთი აკა ტაბუცაძემ დააგვირგვინა – 0:11.
ტაიმის მიწურულს რუსები კარგად მოგვაწვნენ და ლელოს დადების რეალური შანსიც ჰქონდათ, თუმცა ბორჯღალოსნების გმირული დაცვის შედეგად მხოლოდ 3 ქულას დასჯერდნენ – 3:11.
ამ ეპიზოდის შემდეგ ერთი შეხედვით ტაიმი ამ ანგარიშით დამთავრდებოდა, რომ არა თედო აბჟანდაძის ინდივიდუალური ოსტატობა. პირველი ნახევრის დასრულებამდე რამდენიმე წამით ადრე ბორჯღალოსნების ათიანი რუსების რამდენიმე მორაგბეს ბრწყინვალე რეიდით დაუსხლტდა და საქართველოს ნაკრების აქტივში მეორე ლელო ჩაწერა. საბოლოოდ ქართველმა მორაგბეებმა ტაიმი 3:16 მოიგეს.
მეორე ნახევარი რუსების მცირე უპირატესობით დაიწყო და 49-ე წუთზე ჯარიმის დარტყმის შესაძლებლობაც მიიღეს, რომელიც ზუსტად გამოიყენეს – 6:16.
61-ე წუთზე „ბორჯღალოსნებმა“ მესამე ლედო დადეს. აუტიდან მოწოდებულ ბურთზე ისევ მოლი შეიკრა, რომელსაც მომენტალურად ჩვენი გუნდის უპირასტესობა მოჰყვა. საბოლოოდ, მოლიდან გამოტანილი ბურთი ქართველმა მორაგბეებმა ისევ მარჯვენა გადაიტანზეს, რასაც დავით ნინიაშვილის ლელო და აბჟანდაძის მიერ ზუსტად შესრულებული გარდასახვა მოჰყვა 6:23.
აღნიშნული ეპიზოდი დღევანდელ შეხვედრაში საბოლოო აღმოჩნდა. დარჩენილ დროში ქართველ მორაგბეებს რამდენჯერმე ჰქონდათ კიდევ ერთი ლელოს დადების მცდელობა, მაგრამ საბოლოოდ ანგარიში აღარ შეცვლილა.
ამრიგად, ბორჯღალოსნებმა რუსი დათვები ზედიზედ მეოცედ, ისტორიაში კი 23-ედ დაამარცხეს. ქართველი მორაგბეები რაგბი ევროპის ჩემპიონატზე დასკვნით შეხვედრას 28 მარტს, მიხეილ მესხის სახელობის სტადიონზე რუმინეთის ნაკრების წინააღმდეგ გამართავენ. მატჩი 15:00 საათზე დაიწყება.
