ალბათ მუდამ მამის ჩრდილში იქნება, მაგრამ იგივე გზას რომ დაადგა მოულოდნელი ალბათ არავისთვის უნდა ყოფილიყო. მიკსაც სხვაგვარად არ შეეძლო. ის ხომ დიდებული მიხაელ შუმახერის შვილია. იმ შუმახერის, რომელმაც ფორმულა 1-ში უდიდესი ეპოქა შექმნა და 7-ჯერ გახდა მსოფლიო ჩემპიონი.
ამ ტიტულამდე ჯერ გრძელი და რთული გზაა გასავლელი, თუმცა მიკ შუმახერი ნაბიჯ-ნაბიჯ მიიწევს წინ. 2018 წელს, ის ფორმულა 3-ში ევროპის ჩემპიონი გახდა, მაგრამ მიღწეულით არ დაკმაყოფილდა და პროგრესს განაგრძობს. ის დიდ რბოლებს ეტაპობრივად უახლოვდება. გადაწყვეტილი ამბავია, რომ მომავალი წლიდან მიკი უკვე ფორმულა 1-ში იასპარეზებს და მისი თანაგუნდელი ნიკიტა მაზეპინი იქნება.
მანამდე კი მიკ შუმახერმა ფორმულა 2-ის ჩემპიონის წოდება მოიპოვა და სპეციალისტებიც 21 წლის გერმანელ პილოტს საინტერესო მომავალს უწინასწარმეტყველებენ.
