საქართველოს ნაკრების ახალი მთავარი მწვრთნელი, ვილი სანიოლი „ჯვაროსნების“ თავკაცად დანიშვნის შემდეგ, ქართული მედიის წარმომადგენლებს პირველად შეხვდა და მათ კითხვებს ამომწურავად უპასუხა.
ფრანგმა სპეციალისტმა ჩვენი გუნდის შანსებზე, მოახლოებულ თამაშებზე და ეროვნულ ლიგაზე ისაუბრა. ვილი სანიოლის პრესკონფერენციის დეტალებს სრულად გთავაზობთ:
– რამდენად მოასწარით ამ მოკლე პერიოდში გუნდის გაცნობა და რა კრიტერიუმებით შეარჩიეთ შემადგენლობა?
– ძალიან სასიამოვნოა თქვენთან შეხვედრა. ბოლო რამდენიმე კვირის განმავლობაში ჩვენ აქტიურად ვადევნებდით თვალს ყველა კანდიდატს. შერჩევა იოლი გადაწყვეტილება არაა. გასაგებია, არიან ფეხბურთელები, რომლებიც ადრე რეგულარულად თამაშობდნენ, თუმცა, ეს უკვე ახალი ეტაპია, ყველაფერი 0-დან იწყება და ფეხბურთელებმა ყოველ კვირეულად უნდა დაამტკიცონ რომ ნაკრებში სათამაშოდ მზად არიან. არ იქნებოდა სწორი კონკრეტული წესების დამტკიცება, მაგ: ყველა აუცილებლად უნდა თამაშობდეს გუნდში, თუმცა, ეს და ყველა სხვა ფაქტორი გასათვალისწინებელია და აქედან გამომდინარე, შევარჩიეთ ის 25 ფეხბურთელი, რომელიც უახლოეს მატჩებში სათამაშოდ მზადაა.
– გიორგი მაკარიძე და სხვა ფეხბურთელები, რომლებიც შემადგენლობაში ვერ მოხვდნენ.
– რაც შეეხება გიორგი მაკარიძეს. გასაგებია, რომ კლუბებს მუდმივად აქვთ მნიშვნელოვანი მატჩები და ყოველთვის ვცდილობთ თანამშრომლობას, თუმცა, საბოლოო გადაწყვეტილება არის ჩვენი და არა მათი. არსებობს ფიფას წესები და უნდა გამოუშვან ყველა ფეხბურთელი, რომელსაც ჩვენ გამოვიძახებთ. შესაბამისად, სამომავლოდ თუ იქნება მსგავსი შემთხვევები, გადაწყვეტილებას ჩვენ მივიღებთ. აქვე აღვნიშნავ, რომ ეს არ ნიშნავს იმას, რომ ვინც არ არის ამ შემადგენლობაში, სამომავლოდ არ იქნებიან გამოძახებულნი ნაკრებში. ეს 25-კაციანი სია კონკრეტულად მომავალი 3 თამაშისთვის არის განკუთვნილი.
– ეროვნულ ლიგაში მოთამაშე ფეხბურთელები.
– ეროვნულ ლიგაში თამაში არ უნდა წარმოადგენდეს დაბრკოლებას ნაკრებში მოსახვედრად. როდესაც სიას ვადგენდით, ეროვნული ლიგის არაერთი ფეხბურთელი გავითვალისწინეთ. ჩადრაძე, მამარდაშვილი, ჯიღაური, კუპატაძე და ა.შ. რა თქმა უნდა ზოგიერთი ჩემპიონატი ჩვენზე ძლიერია, მაგრამ მთავარია როგორ ფორმაში იმყოფება ფეხბურთელი და სწორედ ამ პრინციპით შევარჩიეთ შემადგენლობაც.
– რამდენად ოპტიმალურია შემადგენლობა?
– ყველა ნაკრებში, მათ შორის წამყვან ქვეყნებშიც კი არსებობს გარკვეული პრობლემები შემადგენლობასთან დაკავშირებით. კლუბებისგან განსხვავებით, ვერ ვიყიდით დამატებით ფეხბურთელებს. ამ ეტაპზე ვერ ვიტყვი არსებობს თუ არა პრობლემები კონკრეტულ პოზიციაზე. გვემატებიან ახალგაზრდა ფეხბურთელები, რომლებიც კარგად თამაშობენ. ზოგადად, ახალგაზრდული ფეხბურთი საქართველოში კარგ დონეზეა და ეს ფეხბურთელები სხვადასხვა პოზიციებზე გაგვაძლიერებენ. დღეის მდგომარეობით, ნახევრამცველები და შემტევები საქართველოს უფრო ბლომად ჰყავს, მაგრამ ვერ ვიტყვი, რომ რომელიმე პოზიციაზე პრობლემა გვაქვს. ამ ეტაპზე არანაირი პრეტენზია არ მაქვს იმ ფეხბურთელების მიმართ, რომელიც გამოვიძახე.
– იქნება თუ არა კანკავა კაპიტანი?
– უკვე დიდი ხანია რაც ჯაბა კანკავა ნაკრების კაპიტანია. მასთან პირადად არ მისაუბრია, აქედან გამომდინარე ამ ეტაპზე კაპიტნად დარჩება, თუმცა შესაძლებელია, რომ მომავალში ეს გადაწყვეტილება შეიცვალოს.
– როგორი სტილით ითამაშებს საქართველოს ნაკრები?
– ჩემს სათამაშო სტილს რაც შეეხება, ეს ცოტა რთული კითხვაა. ყველას სურს შემტევი ფეხბურთის თამაში და დიდი ანგარიშით გამარჯვება, თუმცა მე ჩემი სტილი მაქვს და ეს უნდა მოერგოს ჩვენს რესურსს. ჩვენ გვყავს ბევრი კარგი მოთამაშე, ყველა მატჩი განსხვავებულია და ჩვენი თამაშის სტილი უნდა მოვახვიოთ მეტოქეს.
შეგახსენებთ, რომ საქართველოს ფეხბურთელთა ეროვნული ნაკრები ვილი სანიოლის ხელმძღვანელობით პირველ მატჩს 25 მარტს, სტუმრად შვედეთის ნაკრების წინააღმდეგ გამართავს. 28 მარტს ჩვენი გუნდი თბილისში ესპანეთის ნაკრებს დაუხვდება, 31 მარტს კი სტუმრად საბერძნეთის ნაკრებს დაუპირისპირდება. სამივე მატჩი 2022 წლის მსოფლიოს ჩემპიონატის შესარჩევი ეტაპის ეგიდით გაიმართება.
