მიუხედავად ცუდი პერიოდისა, რომელიც „ლივერპულს“ ბოლო ხანს პრემიერლიგაში უდგას, მერსისაიდელები ჩემპიონთა ლიგაზე მაინც წინ მიიწევენ.
იურგენ კლოპის შეგირდებმა საკმაოდ ყოჩაღი „ლაიპციგი“ დაამარცხეს და თანაც ისე, რომ ორი მატჩის ჯამში გოლი არ გაუშვიათ. „ლივერპულმა“ მეტოქეს გასვლაზეც იდენტური ანგარიშით მოუგო, როგორც განმეორებით მატჩში – 2:0. გოლები მეორე ტაიმში მოჰამედ სალაჰმა და სადიო მანემ გაიტანეს.
მატჩის შემდეგ კმაყოფილი ჩანდა იურგენ კლოპი.
„ეს გამარჯვება ჰაერივით გვჭირდებოდა. იმედი მაქვს მეტი თვითრწმენა და თავდაჯერებულობა შეგვემატება. განსაკუთრებით ის მახარებს, რომ მეტოქეს ყველა კომპონენტში ვაჯობეთ. ლაიპციგი ძალიან კარგი გუნდია. მათ ეს არაერთხელ დაამტკიცეს. გერმანული გუნდი განსაკუთრებით ძლიერი სისწრაფეშია და კონრტშეტევებზე უამრავი ხიფათის შექმნა შეუძლიათ. კარი რომ მშრალად შევინახეთ იმას ნიშნავს, რომ დაცვაშიც კარგად ვითამაშეთ.
ბიჭებს ვუთხარი რომ დაევიწყებინათ პრემიერლიგა და დღევანდელი მატჩისთვის კონცენტრირებულიყვნენ. მოგება ყოველთვის სასიხარულოა, მაგრამ ორმაგად გამიხარდა, რომ ჩემმა ფეხბურთელებმა ამ მატჩისგან სიამოვნებაც მიიღეს. ყველა რგოლით კმაყოფილი ვარ. შემდეგ ეტაპზე გასვლა დავიმსახურეთ“ – აღნიშნა გერმანელმა სპეციალისტმა.
