გლაზგო „რეინჯერსს“ შოტლანდიის ჩემპიონობას მთავარი კონკურენტი „სელტიკი“ ალბათ ვეღარ შეეცილება. სტივენ ჯერარდის გუნდი სატურნირო ცხრილში პირველ ადგილზე მყარად არის და 18 ქულიანი ჰანდიკაპი აქვს.
სტივენ ჯერარდს კი გაცხარება მხოლოდ საფეხბურთო მოედანზე არ სცოდნია. შოტლანდიის ჩემპიონატის მორიგ ტურში, სადაც მისმა „რეინჯერსმა“ სტუმრად „ლივინგსტონს“ 1:0 მოუგო, ჯერარდს არბიტრმა წითელი ბარათი უჩვენა. მიზეზი შესვენებაზე სტივენის მსაჯთან ხმამაღალი კამათი გახლდათ.
ამასობაში კი ბრიტანულ და ზოგადად ევროპულ პრესაში სულ უფრო ხშირად იწერება, რომ მომავალი სეზონიდან ჯერარდი „ლივერპულს“ ჩაიბარსებს, რადგან იურგენ კლოპი გერმანიის ნაკრების თავკაცი გახდება.
ჯერარდის მერსისაიდულ კლუბში მოსვლა არა გვგონია „ლივერპულის“ თუნდაც ერთ ქომაგს მაინც ეწყინოს, ჯეიმი კარაგერი კი სულაც აღფრთოვანებულია და ერთი სული აქვს ეს დღე როდის დადგება.
ალბათ შეხსენება არ უნდა გჭირდებოდეთ, რომ კარაგერი და ჯერარდი „ლივერპულში“ წლების მანძილზე მხარდამხარ თამაშობდნენ, ახლა კი ის ერთ-ერთ ინგლისურ ტელევიზიაში საფეხბურთო ექსპერტად მუშაობს.
„მე შენ მიყვარხარ სტივენ. გელოდებით ლივერპულში მომავალი სეზონიდან“ – მიმართა კარაგერმა ჯერარდს CBS Sport-ის პირდაპირი ეთერიდან.
