საქართველოს ნაკრების ვეტერანი მორაგბე, მალხაზ ურჯუკაშვილი რაგბის კავშირის საპრეზიდენტო არჩევნების გარშემო განვითარებულ მოვლენებს ეხმაურება და ამბობს, რომ კავშირის სათავეში ახალი ძალა უნდა მოვიდეს.
ვეტერანი მორაგბის განცხადებით, რაგბის კავშირს დიდი ხანია ერთი გუნდი მართავს, პრეზიდენტების ცვლილებით კი მათი შემადგენლობა არ იცვლება.
„ქართულ რაგბის სჭირდება ცვლილებები. რაგბის კავშირს ძალიან დიდი ხანია ერთი გუნდი მართავს. იცვლებიან პრეზიდენტები, მაგრამ “ბექგრაუნდში” კვლავ იგივე ხალხი რჩება. მათი მმართველობის დროს გარკვეულ სიმაღლემდე მივედით, მაგრამ 2015 წლის შემდეგ, ქართული რაგბი წინ არ წასულა და ერთ ადგილს ტკეპნის. ამისთვის საჭიროა ახალი ძალა. ირაკლი აბუსერიძე, ილია ზედგინიძე, ირაკლი მაჩხანელი, გოდერძი შველიძე, დავით ზირაქაშვილი და კიდევ სხვა ლეგენდარული მორაგბეები ვართ აქეთ, რომლებმაც ქართული რაგბი დღემდე მოიტანეს. არავის შეურაცხყოფას არ ვაყენებ, მაგრამ მეორე მხარის მხრიდან გამოქვეყნებულ 112-კაციან სიაში 20 კაცის მეტი ვერავინ ვიცანი“, – ამბობს ურჯუკაშვილი.
ვეტერანი მორაგბის განცხადებით, ის შეფასებები, რომ ირაკლი აბუსერიძე კარგი მენეჯერი ვერ იქნება უსაფუძვლოა, რადგან წინასწარ არავინ იცის მისი მენეჯერული თვისებები.
„მე არ ვარ ირაკლი აბუსერიძის მხარეს. მთელი ჩემი ცხოვრება ვიყავი და ვიქნები სიმართლის მხარეს და ახლა ეს სიმართლე არის ირაკლი აბუსერიძისკენ. ბაჩო ხურციძე და ის გუნდი უნდა დარბოდეს ახლა სასამართლოში, არჩეული პრეზიდენტი კი არა. აქამდე სად იყო იოსებ ტყემალაძე, არჩევნებამდე ორი დღით ადრე რომ გამოაჩინეს? გამოსულიყო მანამდე, ეთქვა საკუთარი პროგრამა და იქნებ მას ვუჭერდით მხარს. კარგი მორაგბე შეიძლება არ ნიშნავდეს კარგ მენეჯერს, მაგრამ წინასწარ რა იციან ამ ხალხმა ირაკლი აბუსერიძე როგორი მენეჯერი იქნება? ვაცადოთ უმრავლესობის მიერ არჩეულ პრეზიდენტს საქმის კეთება და შემდეგ 4 წლის მერეც ხომ იქნება არჩევნები. ამით ხომ არ მთავრდება ქართული რაგბი? მორაგბეებს უნდა ჰქონდეთ საშუალება საკუთარი ბედი თავად გადაწყვიტონ და როცა გარკვეულ დარგში პოლიტიკა ერევა, იქ ვერც რაგბი განვითარდება და ვერც ქვეყანა. რაგბის განვითარება თუ უნდა მეორე გუნდს, მაშინ კლუბებს არ დააშინებდნენ არჩევნებზე არ მიხვიდეთო“, – ამბობს ვეტერანი მორაგბე.
შეგახსენებთ, რომ რაგბის კავშირის გამგეობამ განმეორებითი სხდომა 10 მარტს ჩანიშნა. არჩევნებში მონაწილეობას მხოლოდ ერთი კანდიდატი, იოსებ ტყემალაძე მიიღებს. მანამდე, პირველი ყრილობა 24 თებერვალს ჩატარდა, თუმცა საკმარისი კვორუმის არარსებობის გამო დელეგატებმა პრეზიდენტი ვერ აირჩიეს.
უფრო ადრე, 2020 წლის 30 დეკემბერს „ლოკომოტივის“ საწვრთნელ ბაზაზე კავშირის საპრეზიდენტო არჩევნები გაიმართა, რომელშიც ირაკლი აბუსერიძემ გაიმარჯვა. 6 იანვარს საჯარო რეესტრმა ვეტერან მორაგბეს პრეზიდენტად რეგისტრაცია შეუჩერა, მიზეზად კი წესდების შეუსაბამოდ ჩატარებული ყრილობა დასახელდა. ირაკლი აბუსერიძე ახალ არჩევნებს ბოიკოტს უცხადებს და სხდომას არალეგიტიმურად მიიჩნევს.
