რაგბის კავშირის საპრეზიდენტო არჩევნები ისევ ჩაიშალა. ყრილობა ავჭალის სარაგბო სტადიონზე უნდა გამართულიყო, თუმცა სხდომა საკმარისი ქვორუმის არარსებობის გამო ვერ შედგა.
არჩევნებზე 24 სუბიექტი იყო წარმოდგენილი, რაც 42 ხმას ნიშნავს, ყრილობის ჩასატარებლად კი 50 ხმა იყო საჭირო. შესაბამისად, გამგეობას ხელახალი არჩევნების დანიშვნა 30 დღის ვადაში მოუწევს.
სხდომის დასრულების შემდეგ ჟურნალისტებთან რაგბის კავშირის პრეზიდენტობის ერთადერთმა კანდიდატმა, იოსებ ტყემალაძემ ისაუბრა.
„განმეორებითი ყრილობა ჩატარდება, ხმათა უმრავლესობა მაქვს. დელეგატებს ავუხსენი რატომ იყო მნიშვნელოვანი ყრილობის ჩატარება, საქართველოს ნაკრებს თამაშები აქვს და ვთხოვე დრო აღარ დაგვეკარგა. უნდა ავღნიშნო, რომ დიდი ზეწოლაც იყო. შემოსასვლელშიც ნახეთ გადაჭარბებული ემოციები და იყო კლუბების მიმართ შეურაცხყოფაც, რაც დაუშვებელია“, – ამბობს სოსო ტყემალაძე.
მისივე თქმით, თუ შემდეგ ყრილობაზე საკმარისი კვორუმი კვლავ არ შედგება, ის რაგბის კავშირის პრეზიდენტობაზე კენჭს აღარ იყრის.
„სარაგბო თემთან მუშაობას და დელეგატებთან შეხვედრებს ისევ ვაგრძელებთ, მაგრამ ნდობა თუ ვერ მოვიპოვე და კვორუმი არ შედგება, ვიტყვი, რომ რაგბიში არაფერი მესაქმება და კანდიდატურას აღარ წამოვაყენებ“, – განაცხადა ტყემალაძემ
