„მანჩესტერ სიტიმ“ მორიგი გამარჯვება მიითვალა და ინგლისის ჩემპიონობას კიდევ უფრო მიუახლოვდა. „ქალაქელებმა“ სტუმრად „არსენალს“ 1:0 მოუგეს და ამით საკუთარი რეკორდიც გააუმჯობესეს. „სიტიმ“ ინგლისის ჩემპიონატში გასვლაზე ზედიზედ 11 მატჩი მოიგო და ვეჭვობთ ეს ციფრი კიდევ უფრო გაიზრდება.
თავისი შეგირდების გარჯით კმაყოფილია „მანჩესტერ სიტის“ მთავარი მწვრთნელი პეპ გვარდიოლა.
„მარტივ თამაშს არც ველოდით. არსენალთან იოლად ვერავინ გაისეირნებს. ჩვენც რთულ, მაგრამ მნიშვნელოვან გამარჯვებას მივაღწიეთ. ამიტომაც ჩემი ფეხბურთელების მადლიერი ვარ.
მიკელ არტეტა ჩემი მეგობარია და მისი გაწრთვნილი გუნდებისგან ბევრს ვსწავლო. ის მართლაც ჭკვიანი და კარგი უნარ-ჩვევების სპეციალისტია.
წინ საკუთარ მოედანზე ზედიზედ 4 მატჩის გამართვა გველის და მაქსიმალური კონცენტრირება გვმართებს. ჩვენი მიზანი მხოლოდ ტიტულებისკენ სწრაფვაა“ – ამბობს „სიტის“ ესპანელი მთავარი მწვრთნელი.
