საქართველოს მორაგბეთა ეროვნულმა ნაკრებმა რაგბი ევროპის ჩემპიონატის 2020 წლის სეზონის დასვკნითი შეხვედრა რუსეთის ნაკრების წინააღმდეგ გამართა. მატჩი მიხეილ მესხის სახელობის სტადიონზე ჩატარდა და ბორჯღალოსნების გამარჯვებით, 16:7 დასრულდა.
შეხვედრის შემდეგ, ჩვენი გუნდის მთავარმა მწვრთნელმა, ლევან მაისაშვილმა ჟურნალისტების კითხვებს უპასუხა.
„რიგ ეპიზოდებში ბურთი ვერ გავაკონტროლეთ. გვქონდა რაღაც მომენტები, როდესაც ქულის აღება შეგვეძლო, მაგრამ პატარ-პატარა დაუდევრობების გამო ვერ ავიღეთ, რის შედეგადაც საკუთარი თავი წნეხში მოვიქციეთ. მეორე ტაიმში, ისევე როგორც პირველ ტაიმში დავალება იყო, რომ ერთი-ერთზე ბრძოლები უნდა მოგვეგო. თუ ამ ბრძოლებს ვერ მოვიგებთ და ბურთს არ გავუფრთხილდებით, ამ შემთხვევაში ხდება ბურთის დაკარგვა, ეს დროს ჭამს. ამ დროს მოწინააღმდეგე ცდილობს, რომ თამაში გაგვიფუჭოს და გაგვიფუჭეს კიდეც, ამისთვის ისინი კარგად იყვნენ მომზადებულნი. გარდა ამისა, ჩვენც ბევრჯერ დავკარგეთ ბურთი შეტევაში. ყველა ეს დაკარგული ბურთი მოწინააღმდეგის მხარეს გადადის და შესაბამისად, დროს უკვე მეტნაკლებად ის აკონტროლებს. პირველ ტაიმში სტატიკაში გვქონდა პრობლემა და რამოდენიმეჯერ შერკინებაშიც დავჯარიმდით. ეს ჩვეულებრივი ამბავია. რუსებთან სტატიკურ ფაზას თუ ვერ მოვიგებთ და დომინაციას ვერ გავაკეთებთ, თავდაჯერებულობა მოწინააღმდეგის მხარეს მოდის და თამაში პრობლემდება. მეორე ტაიმში ეს პრობლემა გამოვასწორეთ, გამოვასწორეთ სტატიკური ფაზა, მოლიც უკეთესი იყო, ორთაბრძოლებიც უკეთესი იყო და ბურთიც კარგად წავიღეთ, თუმცა თავი იჩინა იგივე პრობლემამ, რაც პირველ ტაიმში გვქონდა. რამოდენიმეჯერ ვერ მოვახერხეთ, რომ ბურთი გაგვეკონტროლებინა და ეს საბოლოო ჯამში ქულებზე აისახა. ეს არის იმის მიზეზი, დამაჯერებლად რატომაც ვერ მოვიგეთ და რასაც ვგეგმავდით, თუმცა, იმის საფრთხე, რომ ეს თამაში წაგვეგო, არცერთ ეტაპზე არ იდგა“, – განაცხადა ლევან მაისაშვილმა.
სრული კომენტარი იხილეთ ვიდეოში:
