ჯანო ანანიძე და ხაბიბ ნურმაგომედოვი ერთმანეთს დუბაიში შეხვდნენ. 28 წლის ფეხბურთელის ყოფილი კლუბი ახალი სეზონისთვის მოსამზადებელ ეტაპს დუბაიში გადის. როგორც ცნობილია ჯანო ანანიძე ამჟამად უგუნდოდაა და ის ემირატებს ესტუმრა, სადაც მოსკოვის „სპარტაკი“ იმყოფება. კლუბის წარომადგენლების განცხადებით, ჯანო დუბაიში საკუთარი სურვილით ჩავიდა და კლუბი მასთან მოლაპარაკებებს არ აწარმოებს.
დუბაიში იმყოფება MMA-ს აწ უკვე ყოფილი მებრძოლი ხაბიბ ნურმაგომედოვიც, რომელიც კარიერის დასრულების შემდეგ თავს სხვადასხვა გზით ირთობს. ხაბიბი „სპარტაკის“ საწვრთნელ ბაზაზეც მივიდა და ფეხბურთლებთან ერთადაც ითამაშა. მან სოციალურ ქსელში სპეციალური ვიდეოც გაავრცელა, სადაც ამბობს, რომ მებრძოლების გუნდმა ფეხბურთლებს 4-ბურთიანი სხვაობით მოუგო.
შეხვედრაში მონაწილეობა მიიღო ჯანო ანანიძემაც და ის ხაბიბ ნურმაგომედოვის ვიდეოშიც მოხვდა. მატჩში მონაწილეობა მიიღო გიორგი ჯიქიამაც, რომელიც დღესდღეობით „სპარტაკის“ და რუსეთის ნაკრების კაპიტანია.
ქართველი ფეხბურთელი ბოლოს „როტორის“ ღირსებას იცავდა, თუმცა ამ კლუბის მაისურით შეხვედრა არ ჩაუტარებია.
