45 გაშვებული გოლი 17 მატჩში. დაგვეთანხმებით ცოტა არ არის. ცოტა კი არა, ძალიან ცუდი მაჩვენებელია. ამა თუ იმ ქვეყნის გუნდები, ამდენ გოლს მთელი სეზონის მანძილზე არ უშვებენ.
ნიდერლანდურმა „ემენმა“ კი ეს მოახერხა. აბა რა ძნელი მისახვედრია, რომ 17 ტურში ასეთი კოლოსალური რაოდენობის გოლის გამშვები გუნდი სატურნირო ცხრილშიც ფსკერზე იქნება და გავარდნის მთავარი კანდიდატია.
თუ ვითარება რადიკალურად არ გამოასწორეს, „ემენს“ ალბათ ეს არ ასცდება და ქვედა დივიზიოონში დაქვეითდება, თუმცა მანამდე გუნდის ქომაგებმა ერთობ ორიგინალური რამ მოიფიქრეს. ერთგულმა გულშემატკივრებმა, რომლებმაც მიმდინარე სეზონში ჯერ მოგების გემო რა არის არ იციან, გუნდის დახმარება გადაწყვიტეს და კარს შავი ლენტი შემოაკრეს.
ბუნებრივია, ეს ორიგინალური ხუმრობა იყო. გულშემატკივრებმა ვითომ ამ ხერხით გადაწყვიტეს მათი საყვარელი გუნდის კარი გაშვებული გოლებისგან დაეცვათ. რა თქმა უნდა, „ვიტესთან“ მორიგი ტურის მატჩის დროს, ლენტები არსად იყო და „ემენმაც“ ტრადიციას არ უღალატა – 4 გოლი გაუშვა.
