თორნიკე შენგელიას ცსკა ევროლიგის მე-17 ტურში იტალიურ მილანოს ესტუმრა და 2020 წელი გამარჯვებით დაასრულა. მატჩი ძალიან დაძაბული გამოდგა, ძირითადი დრო 80:80 დასრულდა, ხოლო ოვერტაიმში მოსკოვურმა გრანდმა მეტოქე მაინც გატეხა და თამაში 91:87 მოიგო.
თოკომ მოედანზე მხოლოდ 15 წუთი გაატარა, რა დროშიც 8 ქულა, 7 მოხსნა და 1 ჩაჭრა დააგროვა. საქართველოს ნაკრების კაპიტანმა 5-დან 4 ორქულიანი ჩააგდო, 5 ჯარიმა აიღო და თამაში ნაადრევად დატოვა.
გუნდს ნიკოლა მილუტინოვმა ულიდერა, რომელმაც 17 ქულა და 19!!! მოხსნა დააგროვა. ორმაგი დუბლი შეასრულა მაიკ ჯეიმსმაც, რომელმაც 20 ქულა და 11 შედეგიანი პასი ჩაიწერა აქტივში.
აღსანიშნავია, რომ ცსკა შეუდარებელ ფორმაშია და ევროლიგაში ზედიზედ მე-12 გამარჯვება იზეიმა. რუსული გუნდი 17 თამაშში მოპოვებული 14 გამარჯვებით ევროლიგას ლიდერობს და მომდევნო ტურში, 7 იანვარს, თორნიკეს ყოფილ გუნდ ბასკონიას ესპანეთში დაუპირისპირდება, სადაც როგორც უკვე იცით თოკო პირველ ნახევარს სწორედ ბასკურ კლუბში ითამაშებს.
