სათაურმა არ დაგაბნიოთ. ისე არ გაიგოთ, თითქოს ესპანური „ლევანტეს“ ქართველმა ლეგიონერმა გუნდში პირველად ითამაშა. აქ ლა-ლიგის მიმდინარე სეზონს ვგულისხმობთ, თორემ გიორგი ქოჩორაშვილი „ლევანტეს“ რიგებში ამას წინათ ესპანეთის თასის გათამაშებაში „მურსიას“ წინააღმდეგ გამოჩნდა და თავი გატანილი გოლითაც გამოიჩინა.
რაც შეეხება ლა-ლიგას, „ლევანტემ“ მორიგ ტურში „ბეტისის“ წინააღმდეგ ნამდვილ თრილერში 4:3 იმარჯვა და თავისი მოკრძალებული წვლილი გიორგი ქოჩორაშვილმაც შეიტანა. 21 წლის ქართველი ფეხბურთელი ვალენსიური გუნდის მწვრთნელმა მოედანზე მატჩის მიწურულს შეუშვა და მოედანზე დაახლოებით 7-8 წუთი დაჰყო. იმ დროისთვის, „ლევანტე“ მოედანზე უკვე კაცნაკლული იყო და გუნდს მნიშვნელოვანი გამარჯვების მიყვანაში ჩვენებურიც დაეხმარა.
სასიხარულოა, რომ გიორგი ქოჩორაშვილისთვის წელი ლა-ლიგაში უთამაშებლად არ დასრულდა. იმედია, გაისად ქართველ ფეხბურთელს გაცილებით მეტი სათამაშო დრო მიეცემა. ისე, რადგან დებიუტი ვახსენეთ, მაშინ ისიც გავიხსენოთ, რომ ესპანეთის ჩემპიონატში გიორგი ქოჩორაშვილმა პირველი მატჩი 12 ივლისს „ბილბაოს“ წინააღმდეგ ითამაშა.
ამ გამარჯვებით „ლევანტემ“ თავი 18 ქულას მოუყარა და გასავარდნ ზონას მცერიდით დაშორდა. მომდევნო მატჩს, „ლევანტე“ 2 იანვარს „ვილიარეალის“ წინააღმდეგ გამართავს.
