2020 წლის იანვარში შეწყვეტილი სიმღერა კვლავ ვერ ნახლდება. იყო იმედი, რომ როჯერ ფედერერი კორტს ზუსტად ერთი წლის შემდეგ იქ დაუბრუნდებოდა, სადაც ბოლოს ითამაშა, მაგრამ მისი მრავალრიცხოვანი გულშემატკივრების გულდასაწყვეტად მაესტრო 2021 წლის პირველი დიდი სლემის ტურნირს გამოტოვებს.
„სამწუხაროდ, როჯერი ავსტრალიის ღია პირველობაზე ვერ ითამაშებს. ბევრი მსჯელობის შემდეგ მან ასე გადაწყვიტა. ბოლო პერიოდში მისი მუხლის და ზოგადად ფიზიკური მდგომარეობის პროგრესი კი შეინიშნებოდა, მაგრამ მომქანცველი სეზონის ხანგრძლივ პერსპექტივაში უმჯობესი იქნებოდა თუ მელბურნში თამაშისგან თავს შეიკავდებდა“ – განაცხადა როჯერის შვეიცარიელმა აგენტმა ტონი გოდსიკმა.
საგულისხმოა, რომ როჯერ ფედერერი ავსტრალიის ღია პირველობას 1998 წლის შემდეგ პირველად გამოტოვებს. ჩოგბურთის მოყვარულთ ალბათ შეხსენება არ უნდა სჭირდებოდეთ, რომ ფედერერმა თავისი რიგით მეოცე მეიჯორი 2019 წელს სწორედ მელბურნის კორტებზე მოიგო.
ამრიგად, უიმბლდონი რჩება ერთადერთ დიდი სლემის ტურნირად, რომელიც შვეიცარიელ მაესტროს კარიერის დაწყების დღიდან არასოდეს გამოუტოვებია.
