ახლახანს, მსოფლიო პრესის ყურადღების ცენტრში ლიონელ მესი და მისი უნიკალური რეკორდი იყო, რომლის მიხედვითაც არგენტინელმა ფორვარდმა ლეგენდარული პელეს რეკორდი დაამხო. მესის ამ არაჩვეულებრივ მიღწევას თავად ფეხბურთის მეფეც გამოეხმაურა და მას დითირამბები მიუძღვნა.
შეგახსენებთ, რეკორდის არსი ერთი გუნდის რიგებში ოფიციალურ შეხვედრებში გატანილ გოლებში მდგომარეობს. სტატისტიკა კი გვეუბნება, რომ მესის „ბარსელონას“ შემადგენლობაში ამის გაკეთება 644-ჯერ შეძლო და პელეს „სანტოსურ“ შედეგს ერთით გადააჭარბა.
ამასობაში, ლეო მესის რეკორდს არ აღიარებს თავად „სანტოსი“. ბრაზილიურმა გუნდმა ოფიციალური განცხადებაც გაავრცელა.
„სტატისტიკოსები ცდებიან. პელემ ჩვენი გუნდის მაისურით 1091 გოლი გაიტანა. დიახ, 643 ოფიციალურ მატჩებში იყო, მაგრამ დანარჩენი ამხანაგურ შეხვედრებში გაიტანა. ვითომ რატომ აკნინებენ ამ მატჩებს? რა, მათ ნაკლები მნიშვნელობა ჰქონდათ?
პელეს მიერ გატანილი 448 გოლის უგულებელყოფას ცდილობენ. მართალია, ამხანაგური სტატუსი ჰქონდა, მაგრამ ის მატჩები ოფიციალური პროტოკოლით გაიმართა. ეს უსამართლობაა“ – ნათქვამია ბრაზილიური გუნდის განცხადებაში, რომელიც „სანტოსის“ გვერდზე გამოქვეყნდა.
