2021 წლის საქართველოს საუკეთესო მორაგბე და გულშემატკივართა რჩეული დავით ნინიაშვილი, “ლიონს” ზაფხულში შეუერთდა და მიუხედავად ასაკისა, საკუთარი თამაშით სწრაფად დაიმკვიდრა ადგილი ფრანგული გუნდის შემადგენლობაში.
საქართველოს რაგბის კავშირის ოფიციალურმა ვებ-გვერდმა 19 წლის ბორჯღალოსანთან, ინტერვიუ ჩაწერა და ახალგაზრდა მორაგბემ სხვადასხვა საინტერესო თემებზე ისაუბრა.
“პირველი ლელო ტოპ 14-ში მეც ძალიან გამიხარდა, მაგრამ ემოციების და აღტაცების გამოხატვა არ მეხერხება. ამ ლელოში დიდი წვლილი მიუძღვის ლიმა სოპოაგას. შერკინება გამეორდა და მან ამ კომბინაციის გათამაშება შემომთავაზა, რაზეც დავთანხმდი და ლელოც გავიტანე.
რაც თავი მახსოვს, სულ ვუყურებდი რაგბის ვიდეოებს, ვიღებდი ცოდნას და ვცდილობდი მის განხორციელებას, სულ ვვარჯიშობდი უნარების დახვეწაზე და ახლაც ასე ვარ. თუმცა ჯერ ვერ ვიტყვი, რომ “ლიონში” თავი უკვე დავიმკვიდრე. ბევრი ტრავმირებული გვყავს და თამაში მიწევს. მერე ვნახოთ რა იქნება. მწვრთნელსაც მოსწონს ჩემი სტილის მოთამაშეები, თავით თავში რომ ასკდებიან მოწინააღმდეგეს და ნდობაც ალბათ ამან განაპირობა. მოედანზე არასდროს არაფერს ვერიდები და ყველა თამაშში 100%-ზე მეტად ვიხარჯები.
“ხვამლში” თავიდან ფულბეკის პოზიციაზე ვიდექი და ძალიან მომწონდა. მერე გუნდში სიტუაციიდან გამომდინარე ფლანკერად მომიწია თამაში და ბოლო 3 წელია ხაზში დავბრუნდი. ახლა 12 თამაში ფრთაზე ჩავატარე და ძალიან მომწონს ეს პოზიცია – ამოვდივარ, ბოჭვის შესრულება და დაკიდებულ ბურთებზე თამაში მიწევს, რაც ძალიან მიყვარს. ხაზში სადაც არ უნდა დამაყენონ ნებისმიერ პოზიციაზე სიამოვნებით ვითამაშებ.
“ლიონის” უპირველესი მიზანი ექვსეულში შესვლაა და მერე ჩემპიონობისთვის ვიბრძოლებთ. ამ მომენტისთვის მეოთხე ადგილზე ვართ, თუმცა მდევრებს ჩვენზე ნაკლები თამაში აქვთ ჩატარებული. ექვსეულში მოსახვედრად იანვარი-თებერვალი მნიშვნელოვანი იქნება”, – განაცხადა ნინიაშვილმა.
