“დინამო თბილისმა” 1981 წელს სანტიაგო ბერნაბეუზე გამართულ ტურნირზე მადრიდის “რეალთან” 2:4 წააგო, თუმცა ქართველმა თავდამსხმელმა ვლადიმერ გუცაევმა ძალიან კარგი შთაბეჭდილება დატოვა და შტილიკეს, დელ ბოსკესა და სხვებს არაფერი დაუთმო.
ლეგენდარულმა ფეხბურთელმა სწორედ იმ პერიოდზე ესაუბრა, როდესაც მისი მადრიდის “რეალში” გადასვლა ძალიან რეალური იყო, თუმცა, საბჭოთა სისტემის გამო, ტრანსფერი ვერ განხორციელდა.
“დიდი ემოციების ქვეშ ვიყავი და ამავდროულად ძალიან ბედნიერიც, თუმცა, ისიც მესმოდა, რომ შეუძლებელ რამეზე ვფიქრობდი. მაშინდელ საბჭოთა კავშირში ასე იყო. ვფიქრობ, მართლაც კარგი მატჩი მქონდა. თამაშის შემდეგ ნოდარ ახალკაცი მოვიდა და მითხრა, რომ მადრიდელები მზად იყვნენ, ჩემი ტრანსფერისთვის ნებისმიერი თანხა გადაეხადათ. რეალის წინადადება რომ მიმეღო და ესპანეთში დავრჩენილიყავი, თბილისის დინამო და ყველა ჩემი ახლობელი სერიოზული პრობლემების წინაშე აღმოჩნდებოდა. გამორიცხული არაა, ისინი სამშობლოს მოღალატეებადაც კი გამოეცხადებინათ.”
“ესპანელებს ვუთხარი, რომ საქართველოში არა მხოლოდ ჩემი ოჯახი, არამედ საყვარელი მანქანა “ვოლგაც” მრჩებოდა. ესპანელები დიდ ხანს ცდილობდნენ გაერკვიათ, რა მანქანასთან განშორებას ვერ ვახერხებდი.”
“რეალის წარმომადგენლები ისევ არ დანებდნენ და კიდევ ერთი ვარიანტი წამოაყენეს. მათ ფორვარდების გაცვლა შემოგვთავაზეს და მზად იყვნენ, ჩემს სანაცვლოდ დინამოში სანტილიანა ან ხუანიტო გამოეშვათ. ცხადია, ეს წინადადებაც ვუარყავით და ესპანელების გაოცება ამ შემთხვევაშიც დიდი იყო.”
“ესპანელებს ვერ წარმოედგინათ რა სიძლიერის უნდა ყოფილიყო საბჭოთა კავშირის ნაკრები, თუკი მის შემადგენლობაში ვლადიმერ გუცაევიც კი ვერ ხვდებოდა. მიუხედავად ყველაფრისა, მადრიდში ჩატარებული მატჩებით ძალიან კმაყოფილი ვარ. ყველას ვაჩვენეთ, რომ ფეხბურთის თამაში პატარა საქართველოშიც შეეძლოთ”, – იხსენებს “დინამოს” ლეგენდარული ფეხბურთელი.
ამგვარად, გუცაევმა თამაში “დინამო თბილისში” გააგრძელა, თუმცა, ისე მოხდა, რომ სწორედ ესპანეთში გამართულ 1982 წლის მსოფლიოს ჩემპიონატზე არ წაიყვანეს. სწორედ ამიტომ ქართველმა ფეხბურთელმა “რეალის” წინადადებაზე უარი თქვა, მიზეზად კი ის დაასახელა, რომ ქვეყნისა და ქომაგების უდიდესი სიყვარულის გამო, მისთვის სხვა ქვეყანაში გადასვლა წარმოუდგენელი იყო. მიუხედავად ამისა, “რეალის” მენეჯერები ისევ აქტიურობდნენ და გუცაევს უფრო დამაჯერებელი მიზეზის მოგონება მოუხდა.
