საქართველოს ნაკრების 21 წლის კალათბურთელი „მილოუკ ბაქსმა“ G ლიგის გუნდ „ვისკონსინ ჰერდში“ გაუშვა. ამის შესახებ ინფორმაციას ამერიკული მედია აქტიურად ავრცელებს, თუმცა კლუბს სანდროს გაშვება ოფიციალურად ჯერჯერობით არ დაუდასტურებია.
ადგილობრივი მედიის ინფორმაციით მილოუკმა აღნიშნული გადაწყვეტილება სანდროს განვითარების გამო მიიღო. ერთ-ერთი სააგენტო წერს, რომ „ვისკონსინ ჰერდში“ თამაში 21 წლის კალათბურთელის პროგრესისთვის დადებითად აისახება და წარმატებით ასპარესობის შემთხვევაში მილოუკი მას მთავარ გუნდში მალევე დააბრუნებს.
„მამუკელაშვილს შუზღუდულ დროში მისი უნარების სრული კომპლექტის გამოჩენის შესაძლებლობა არ ექნება. სანდროსთვის, პასისა და ბურთის ტარების უნარის გასაუმჯობესებლად, კარგია G ლიგაში გადასვლა, სადაც მისი განვითარება პრიორიტეტი იქნება. კარგია, რომ საუკეთესო ლიგაში გამოცდილება დაუგროვდა, მაგრამ მისი მომავლისთვის G ლიგაში გადასვლა საუკეთესო გადაწყვეტილებაა“, – წერს behindthebuckpass-ის ჟურნალისტი.
შეგახსენებთ, რომ სანდრო მამუკელაშვილი „ბაქსმა“ დრაფტზე 54-ე ნომრად აიყვანა. ბოლოს მან NBA-ში გუშინ, გოგა ბითაძის „ინდიანა პეისერსის“ წინააღმდეგ ითამაშა და არასრულ 10 წუთში 2 ქულა და 3 მოხსნა დააგროვა.
