დღეს, საქართველოს მთავრობამ ტოკიო 2020-ზე წარმოდგენილ სპორტსმენებს უმასპინძლა, სადაც ცნობილი გახდა, რომ ვერცხლის მედლის მფლობელები საჩუქრად 500 ათას ლარს მიიღებენ, ბრინჯაოს პრიზიორს კი 250 ათასი ლარი გადაეცემა.
ინფორმაცია პრემიერ-მინისტრმა ირაკლი ღარიბაშვილმა გააჟღერა, სიტყვით გამოსვლის დროს კი მან ოლიმპიელებს გაწეული სამუშაოსთვის მადლობა გადაუხადა და განაცხადა, რომ მათი წარმატება მომავალი თაობისთვის მაგალითის მისაცემად მნიშვნელოვანი იქნება.
„ძვირფასო ოლიმპიელებო, ჩვენო საამაყო გმირებო, თქვენ მართლაც საოცარი შედეგი დადეთ – 8 მედალი, რომელიც დამოუკიდებელი საქართველოს ისტორიაში არის ისტორიული შედეგი. მედლების რაოდენობის მიხედვით, საქართველო მსოფლიო ტოპ ათეულში შევიდა. მადლობა თქვენ ამისთვის, მადლობა გამარჯვებისთვის, მთელი მთავრობის სახელით კიდევ ერთხელ მადლობას მოგახსენებთ. მე ასევე მაქვს პატივი გაგაცნოთ ჩემი გადაწყვეტილება. მოგეხსენებათ, წასვლის წინ გაგაცანით, რომ ოქროს მფლობელი მიიღებს 1 მილიონ ლარს. ახლა რაც შეეხება ვერცხლის მფლობელებს, მინდა გაცნობოთ, რომ თქვენი ჯილდო იქნება 500 ათასი ლარი, ბრინჯაო კი 250 ათასი ლარი. მინდა მადლობა გადავუხადო ყველას, ექიმებს, მწვრთნელებს, ყველა იმ ადამიანს, ვინც თქვენს გვერდით იდგა. კარგად მესმის რას ნიშნავს ოლიმპიელობა, რას ნიშნავს მთელი ქვეყნის სახელით წარსდგე მსოფლიო არენაზე და მოიპოვო ასეთი ბრწყინვალე გამარჯვება. მე ისიც ვიცი, თუ რა დგას ამ შედეგის უკან, ამის მიღმა დგას თქვენი თავდაუზოგავი შრომა, თავდადება და თავგანწირვა ჩვენი ქვეყნის და ხალხის სახელით. კიდევ ერთხელ გიხდით მადლობას. თქვენ ხართ მაგალითი ჩვენი მომავალი თაობისთვის, შვილებისთვის, რომლებიც გიყურებენ თქვენ და სწორედ თქვენს მაგალითზე უნდა აღიზარდონ“, – განაცხადა ირაკლი ღარიბაშვილმა.
შეგახსენებთ, რომ ტოკიო 2020-ზე საქართველოს დელეგაციამ ქვეყნის დამოუკიდებლობის ისტორიაში რეკორდული 8 მედალი მოიპოვა – 2 ოქრო, 5 ვერცხლი, 1 ბრინჯაო.
