ფარსაგი ამბავი შეემთხვა უგანდის ძალოსნობის ნაკრების დელეგაციას. თითქოს პანდემიით გამოწვეული მკაცრი რეგულაციების დაცვა და ამის გამო ოლიმპიური თამაშების ორგანიზების მხრივ დამატებითი პრობლემები არ კმაროდაო, იაპონელ სამართალდამცავებს ახალი და ყოვლად გაუთვალისწინებელი თავისტკივილი გაუჩნდათ.
საქმე იმაში გახლავთ, რომ უგანდელი ძალოსანი იულიუს სეკიტოლეკო, რომელიც თავისი ქვეყნის ნაკრებთან ერთად უკვე იაპონიაში იმყოფებოდა და ოლიმპიური თამაშებისთვის ემზადებოდა გაუჩინარდა და მას ამომავალი მზის ქვეყნის პოლიცია ყველგან ეძებს.
უგანდის ძალოსანთა ნაკრები ტოკიოდან 500 კილომეტრის მოშორებით ქალაქ იზუმისანოში იყო დაბანაკებული და მოსამზადებელ ეტაპს იქ გადიოდა. იულიუს სეკიტოლეკო (67კგ) გუნდთან ერთად კი იყო, მაგრამ მას ოლიმპიურ თამაშებში ასპარეზობა გარანტირებული არ ჰქონდა და ასე ვთქვათ სათადარიგოებში ირიცხებოდა. როგორც ირკვევა, ახალგაზრდა ძალოსანი თავდაუზოგავად ვარჯიშობდა და იმედი ჰქონდა, რომ ნაკრების სამწვრთნელო შტაბი მას შანსს მისცემდა, თუმცა მას შემდეგ რაც აცნობეს, რომ ძირითად გუნდს მიღმა დარჩა და ტოკიოს ოლიმპიადაზეც მონაწილეობას ვერ მიიღებდა, იულიუს სეკიტოლეკო გაუჩინარდა.
უგანდელი ძალოსნის გაუჩინარების შესახებ ეჭვი მას შემდეგ გაჩნდა, რაც ის სავალდებულო კოვიდ ტესტის ჩასაბარებლად არ გამოცხადდა. მას სასტუმროს ნომერშიც მიაკითხეს, თუმცა ვერც იქ ნახეს.
უგანდის ძალოსნობის ფედერაციის ხელმძღვანელობის თქმით, ის საკმაოდ ნიჭიერი სპორსტმენია და ვარჯიშებზე მაქსიმალურად იხარჯებოდა, თუმცა ამჯერად მთავარ გუნდში მისთვის ადგილი ვერ გამოიძებნა. შესაძლოა იულიუს სეკიტოლეკოც ამან გააბრაზა და შეკრებაც ამიტომ მიატოვა.
იულიუს სეკიტოლეკოზე იაპონიის პოლიციამ ქვეყნის მასშტაბით ძებნა გამოაცხადა.
