იტალიური „მილანის“ ქომაგები წესით მეტად კარგ ხასიათზე უნდა იყვნენ. ეს ხომ ის შემთხვევა არ არის, როდესაც ევროთასებზე საკუთარი ქვეყნის ნებისმიერ გუნდს ქომაგობ. იტალიელი ტიფოზებისთვის და მითუფრო მოსისხლე მტრების ბანაკში მყოფი გულშემატკივრებისთვის ეს ვალდებულება არ არსებობს.
მიხვდებოდით, „ინტერის“ ჩაფლავებას ვგულისხმობთ. ანტონიო კონტეს გუნდი ჩემპიონთა ლიგას სამარცხვინოთ გამოეთიშა. ჯგუფში ვინ არ ჩარჩენილა, თუნდაც „მანჩესტერ იუნაიტედი“ რად ღირს, მაგრამ ინგლისელები ევროტურნირებს მაინც არ გამოთიშვიან. მათ ევროპალიგაზე გადაინაცვლეს. აი, „ინტერისთვის“ კი მიმდინარე ევროსეზონი დასრულებულია. მილანური გუნდი ჯგუფში ბოლო ადგილზე გავიდა და წინ „შახტარი“ გაუშვა. კონტეს შეგირდებმა უკრაინული გუნდის დამარცხება ვერცერთხელ შეძლეს და ორივე მატჩი ნულოვანი ფრით დასრულდა.
„იმედგაცრუებულები ვართ. სხვაგვარად ვერ ვიქნებით. ეს ფეხბურთია, სადაც ყოველთვის ძლიერი ვერ იგებს.
შახტართან ორივე დაპირისპირებაში ვდომინირებდით და უდიდეს უპირატესობას ვფლობდით, მაგრამ სამწუხაროდ ეს შედეგში ვერ ავსახეთ. ევროპა ლიგის წინა სეზონის ნახევარფინალშ მათ 5:0 მოვუგეთ, ახლა კი ორ მატჩში გოლი ვერ გავიტანეთ, თუმცა ფეხბურთელებზე აუგს ვერ ვიტყვი. ისინი ბოლომდე დაიხარჯნენ, მაგრამ იღბალი ჩვენს მხარეს არ იყო.
ანალიზი ცივ გონებაზე უნდა გავაკეთოთ და არა ცხელ გულზე. ვფიქრობ მონდომება და აგრესია არ გვაკლდა, მაგრამ როგორც უკვე ვთქვი, ეს ჩვენი დღე არ იყო. ისიც სათქმელია, რომ ჯგუფური ეტაპის მანძილზე ხშირად ვიჩაგრებოდით. ხან მსაჯების უსამართლო გადაწყვეტილებების და ხან VAR-ის გამო. ახლა ამაზე ლაპარაკს აზრი აღარ აქვს.
საბოლოოდ ამ ფიასკოს მიზეზები მაინც ჩვენ თავში უნდა ვეძიოთ. ვერ გაიტან გოლს, ვერ მოიგებ“ – თქვა გულდაწყვეტილმა ანტონიო კონტემ.
