დიდი სლემების 23-გზის ჩემპიონი სერენა უილიამსი ხანგრძლივი პაუზის შემდეგ რომის მასტერსზე გამოჩნდა და თუ რაიმე ხელისშემშლელი ფაქტორი არ იქნება, მოახლოებულ როლან გაროსზეც აუცილებლად იასპარეზებს.
მეიჯორების და სხვა უამრავი ტიტულების გარდა, დიდებული ამერიკელი ჩოგბურთელი ოლიმპიური ჩემპიონიც გახლავთ. სერენამ ოქროს მედალი 2012 წლის ლონდონის თამაშებზე მოიპოვა.
წინ ტოკიოს ოლიმპიური თამაშებია, სადაც სერენა უილიამსს ადგილი გარანტირებული აქვს, თუმცა თავად იაპონიაში გამგზავრებაზე ჯერ კიდევ ყოყმანობს. მიზეზი ქალიშვილია, რომელსაც სხვათა შორის მეტად საინტერესო სახელი აქვს – ოლიმპია.
სერენა უილიამსს შვილთან დიდხანს განშორება აფიქრებს, ტოკიოში კი მას ალბათ ვერ წაიყვანს, რადგან პანდემიასთან დაკავშირებული რეგულაციები შეუშლის ხელს.
„ამ საკითხზე სერიოზულად ჯერ არ დავფიქრებულვარ. რა თქმა უნდა, მსურს ოლიმპიურ თამაშებში მონაწილეობა, მაგრამ შვილის ამბავიც მაღელვებს. მას ჯერ ერთი ღამეც არ გაუთენებია უჩემოდ“ – ამბობს ქალთა ჩოგბურთის მონსტრი სერენა უილიამსი.
ტოკიოს ოლიმპიური თამაშები 23 ივლისს დაიწყება და 9 აგვისტოს დასრულდება.
