განსაკუთრებული და მაღალი მწვერვალები არ დაუპყრია, მაგრამ საჩოგბურთო სამყაროში ამინდს ნამდვილად ქმნიდა. მასთან თამაში მარტივი არასოდეს ყოფილა და არაერთი ტოპ ჩოგბურთელიც გაუმწარებია.
ბარბარა სტრიკოვამ კარიერა დაასრულა. 35 წლის ჩეხი ჩოგბურთელი კარიერაში მხოლოდ ორი მოგებული ტიტულით იწონებს თავს, თუმცა როგორც უკვე ავღნიშნეთ, მეტოქეებისთვის მარტივ ნადავლად და ხელწამოსაკრავ ჩოგბურთელად არასოდეს მიიჩნეოდა.
მისი საუკეთესო მაჩვენებელი ერთეულთა რეიტინგში მე-16 ნომრობა იყო, დიდ სლემებზე კი მაქსიმუმს 2019 წელს მიაღწია, როდესაც უიმბლდონის ნახევარფინალში გავიდა.
ბარბარა სტრიკოვამ, ჩოგნის გვერდზე გადადება მეტად საპატიო მიზეზის გამო გადაწყვიტა. მალე ის დედა გახდება. აწ უკვე ყოფილმა ჩეხმა ჩოგბურთელმა ფეხმძიმობის შესახებ მარტში განაცხადა.
ნიშანდობლივია, რომ ბარბარა სტრიკოვა თებერვალში გამართულ ავსტრალიის ღია პირველობაზე უკვე ფეხმძიმედ იყო, თუმცა მელბურნში მაინც ითამაშა და პირველ წრეში დამარცხდა.
ბარბარა სტრიკოვა გაცილებით წარმატებით თამაშობდა წყვილთა თანრიგში და ამაზე ჩეხის მიერ ნაჩვენები შედეგებიც თვალნათლივ მეტყველებს. წყვილთა შორის მის ანგარიშზე 31 მოგებული ტიტულია, აქედან 2019 წელს უიმბლდონი, ხოლო 2016 წელს რიოს ოლიმპიადაზე ბრინჯაო დაისაკუთრა.
