დინამოს გამამწარებელი და ვლადიმირ ვაისის ახალი ნავსაყუდელი?

სლოვაკი სპეციალისტი, რომელსაც უნიკალური შანსი ჰქონდა ქართული ფეხბურთის ისტორიაში ოქროს ასოებით ჩაწერილიყო, კვლავ უმუშევარია და სასურველი ვარიანტების ძიებაშია.

ვლადიმირ ვაისი, რომელიც 2016-2020 წლებში საქართველოს ნაკრებს თავკაცობდა, შარშან ნოემბრის შემდეგ უქმობს. ისე, ნიშანდობლივია, რომ საკუთარ სამშობლოში ანუ სლოვაკეთში ვაისი 2020 წლის საუკეთესო მწვრთნელად დასახელდა.

„დუნაისკა სტრედა“ – ეს სლოვაკური გუნდი წესით ქართული ფეხბურთის და განსაკუთრებით თბილისის „დინამოს“ ქომაგებს წესით კარგად, თუმცა არცთუ ისე ტკბილად უნდა აგონდებოდეს. 3 წლის წინ, „დინამო“ ევროთურნირების პირველი ეტაპიდან სწორედ „დუნაისკა სტრედამ“ გამოთიშა, როდესაც სტუმრად ნათამაშები ფრის (1:1) შემდეგ, თბილისში 1:2 წააგო.

ჰოდა, ამბობენ, ვლადიმირ ვაისის ახალი ნავსაყუდელი სწორედ „დუნაისკა სტრედა“ იქნებაო. სლოვაკურმა გუნდმა მთავარი მწვრთნელი ბერნდ შტორკი თანამდებობიდან დაითხოვა და მის შემცვლელად სწორედ ვლადიმირ ვაისი მოიზრებაო.

საგულისხმოა, რომ ფეხბურთელობის ჟამს, ვლადიმი ვაისი „დუნაისკა სტრედაში“ თავადაც თამაშობდა, ახლა კი შესაძლოა ამ გუნდის მთავარი მწვრთნელი გახდეს.