გრანდებსაც აქვთ ჩავარდნები. ისინიც მარცხდებიან დიდი ანგარიშით, თუნდაც საკუთარ მოედანზე. ეს ფეხბურთია და ბურთი მრგვალია, მაგრამ გაგიკვირდებათ და აქამდე „კამპ ნოუზე“ არცერთ იტალიურ გუნდს 3 გოლი გატანილი არ რქონდა.
ეს კი პირველად „იუვენტუსმა“ შეძლო. ახლო წარსულში ტურინელთა უდიდესი ფეხბურთელი, მაგრამ ჯერ მაინც გამოუცდელი მწვრთნელი ანდრეა პირლო ამით უკვე ისტორიაში ჩაეწერა. მისმა გაწვრთნილმა „იუვენტუსმა“ „ბარსელონას“ კუდით ქვა ასროლინა და 3:0 მოუგო. ამ გამარჯვებით, „იუვენტუსმა“ ჯგუფში პირველი ადგილიც გაინაღდა.
„ამ უქმეებზე ტურინული დერბი გვქონდა, სადაც განსაკუთრებით მეორე ტაიმში უმაღლესი დონის ფეხბურთი ვაჩვენეთ. ბარსელონასთან დღევანდელმა გამარჯვებამაც ის მატჩი გამახსენა იმ განსხვავებით, რომ ამ შემთხვევაში მთელი მატჩის მანძილზე სადავეები ხელიდან არ გაგვიშვია.
უმთავრეს ამოცანად მატჩის მიმდინარეობისას და განსაკუთრებით შეტევით ფაზაში რიცხობრივი უპირატესობის შექმნა დავისახეთ და ბიჭებმაც დავალება საუკეთესოდ შეასრულეს. რონალდოზე კი რა უნდა ვთქვა? უჩემოდაც ყველამ იცის რა დონის პროფესიონალიცაა.
ბარსელონასთან შინ წაგების შემდეგ, კატალონიაში გაბრაზებულები ჩამოვედით და რევანში გვწყუროდა. მოხარული ვარ, რომ ეს შევძელი“ – თქვა მატჩის შემდეგ გახარებულმა ანდრეა პირლომ.
