სპორტის გულშემატკივარი ალბათ შეეჩვია, რომ ნებისმიერ სახეობაში ამა თუ იმ მატჩის მიმდინარეობის დროს მწვრთნელები, ფეხბურთელები, მსაჯები და ა.შ. ერთმანეთს პირზეხელაფარებული ესაუბრებიან. ეს იმით არის გამოწვეული, რომ ტუჩების მოძრაობით სავსებით შესაძლებელია დიალოგის გაშიფვრა.
როგორც ჩანს, ჯენარო გატუზოს და ფაბიო კუალიარელას ეს გარემოება დაავიწყდათ ან არაფრად ჩააგდეს და იტალიის ჩემპიონატის 30-ე ტურში, რომელშიც „სამპდორიამ“ „ნაპოლის“ უმასპინძლა ერთმანეთს გამოელაპარაკნენ.
ისე, ის საუბარი აგრესიის გამომჟღავნება უფრო იყო, ვიდრე უბრალოდ გამოლაპარაკება. მოკლედ, მატჩის მიმდინარეობისას, „სამპდორიას“ კაპიტანი ჯენარო გატუზოსთან მივიდა და რაღაც უთხრა, პასუხად კი უხამსი სიტყვები მიიღო.
სტადიონზე უმაყურებლობის გამო, გატუზოს და კუალიარელას საუბარი კარგად ისმოდა და მედიასაც მისი გაშიფვრა არ გასჭირვებია.
„თქვენ მატჩის კომენტატორი ხართ“ – მიმართა კუალიარელამ გატუზოს, რაზეც ნეაპოლიტანელთა მთავარმა მწვრთნელა უპასუხა – „რა ჯანდაბა გინდა? თამაშზე კონცენტრირდი და შეეშვი ჩემი ტვინის ბურღვას“.
ფაბიო კუალიარელამ გატუზოს რჩევა კი გაითვალისწინა და მატჩზე გადაფოკუსირდა, მაგრამ მისმა გუნდმა მაინც 0:2 წააგო.
„ნაპოლი“ ჩემპიონთა ლიგის ზონაში მოსახვედრად იბრძვის და ოთხეულს მხოლოდ 2 ქულით ჩამორჩება.
