გამოცემა The Los Angeles Times-თან ინტერვიუში, ლეიკერსის სუპერვარსკვლავმა ლებრონ ჯეიმსმა განაცხადა, რომ ის NBA-ს მმართველთა გადაწყვეტილებამ 20/21 სეზონის 22 დეკემბერს დაწყების შესახებ ძალიან გააკვირვა, ამის გამო „მეფეს“ ოჯახის საშობაოდ დაგეგმილი შვებულების გაუქმება მოუწია.
„სიმართლე გითხრათ, ასეთ გადაწყვეტილებას არ ველოდი, რადგან თავიდან საუბარი იანვრის შუა რიცხვებზე იყო და საწვრთნელი შეკრების დაწყება შობის შემდეგ იყო დაგეგმილი. ამის გამო შესაძლებლობა გვქონდა შობა ოჯახებში გაგვეტარებინა.
მე ოჯახთან ერთად შვებულება უკვე დავგეგმე კიდეც, თუმცა ლიგის გადაწყვეტილების გამო იქ ვერ წავალ. ასე რომ, სეზონის 22 დეკემბერს დაწყებამ გეგმები სრულიად ამირია, თუმცა ტიტულის დასაცავად მზად ვარ.
რაც შეეხება ენტონი დევისს, მან მოლოდინები სრულად გამიმართლა. ის მართლაც გამორჩეული მოთამაშეა და თამამად შეგვიძლია ვთქვათ, რომ მსოფლიოში ერთ-ერთი საუკეთესოა.
ჩვენ აქ ვართ, ამ კლუბის ერთგულები ვართ და სასიამოვნოა, რომ ლეიკერსსაც სჯერა ჩვენი, ეს უმნიშვნელოვანესია“ – განაცხადა NBA-ს მოქმედმა ჩემპიონმა.
შეგახსენებთ, რომ ჯეიმსმა და დევისმა, ლეიკერსს 2010 წლის შემდეგ პირველი ლიგის ტიტული მოაგებინეს. სუპერვარსკვლავებმა მომავალი სეზონის დაწყების წინ კალიფორნიელებთან ახალი კონტრაქტები გააფორმეს.
მოთამაშეებმა გუნდისგან მაქსიმალური კონტრაქტები მიიღეს, „მეფემ“ ორწლიანი 85 მილიონი დოლარის ღირებულების, ხოლო დევისმა ხუთწლიანი, რა დროშიც 190 მილიონ დოლარს მიიღებს.
