2021 წლის მაიამის მასტერსი უკვე წარსულია. იმთავითვე ნათელი იყო, რომ ტურნირს შესაძლოა უჩვეულო გამარჯვებული ჰყოლოდა და მასტერსი პირველად მოეგო, რადგან მაიამიში ყველა ტოპ ჩოგბურთელმა მონაწილეობაზე უარი თქვა, ეს კი ბოლო 17 წლის მანძილზე პირველად მოხდა.
საბოლოოდ მაიამის საჩემპიონო თასი ჰუბერტ ჰურკაჩმა ჩაიხუტა. პოლონელი ჩოგბურთელი ამაზე ალბათ კიდევ დიდხანს ვერ იოცნებებდა, მაგრამ როგორც უკვე ვთქვით ფედერერის, ჯოკოვიჩის, ნადალის, ტიმის და კიდევ რამდენიმე ტოპ ჩოგბურთელის არყოფნით მშვენივრად ისარგებლა და ეს შანსი ხელიდან აღარ გაუშვა.
ჰურკაჩმა ფინალში იანიკ სინერი ორ სეტში – 7:6, 6:4 დაამარცხა. 19 წლის იტალიელი ჩოგბურთელისთვისაც ეს მასტერსის მოგების ისტორიული შანსი იყო და ეჭვგარეშეა ამ მარცხით გული ორმაგად დაწყდებოდა.
ჰუბერტ ჰურკაჩმა მაიამიში ჩემპიონობით 300 ათასი დოლარი და 1000 სარეიტინგო ქულა გამოიმუშავა. ამის წყალობით, პოლონელმა მეჩოგნემ რეიტინგის ტოპ ოცეულში პირველად შეაღწია.
