ნობელ არუსტამიანი თავის ტელეგრამ-არხზე ხვიჩა კვარაცხელიას შესახებ საინტერესო ინფორმაციას ავრცელებს.
მისი თქმით ახალგაზრდა ქართველმა შესაძლოა კარიერა იტალიის ჩემპიონატში გააგრძელოს.
„ევროპული გუნდები უკვე იწყებენ მოლაპარაკებებს ხვიჩასთან და მის წარმომადგენლებთან. რამდენადაც მე ვიცი, მისი აგენტი მამუკა ჯუღელი იტალიაში გაფრინდება, სადაც მოლაპარაკებებს „მილანისა“ და „იუვენტუსის“ წარმომადგენლებთან გამართავს. მხარეები კვარაცხელიას შესაძლო ტრანსფერის საკითხს განიხილავენ. ასევე, ქართველის მიმართ განსაკუთრებული ინტერესით „ნაპოლი“ გამოირჩევა.
როგორც ამბობენ, იტალიაში ხვიჩას კახა კალაძე დიდ რეკლამას უკეთებს. „მილანის“ ლეგენდას აქტიურად ეკითხებიან ხვიჩას პოტენციალის შესახებ და მან ის საუკეთესოდ დაახასიათა. კალაძემ კვარაცხელიას საკითხი განიხილა არა მხოლოდ აგენტებთან, არამედ „მილანის“ ტექნიკურ დირექტორ პაოლო მალდინისთან, რომელიც დაცვაში მისი პარტნიორი იყო. მან თბილისში საქართველო-ესპანეთის მატჩზე თავისი წარმომადგენელიც კი გაგზავნა”, – წერს არუსტამიანი.
ხვიჩას შესახებ მითქმა-მოთქმა არ წყდება, ცოტა ხნის წინ გერმანული გამოცემები წერდნენ, რომ ქართველი ფეხბურთელით მიუნხენის ბაიერნი დაინტერესდა.
ამ სეზონში კვარაცხელიამ მონაწილეობა მიიღო რუსეთის პრემიერ ლიგაში ყაზანის რუბინში ჩატარებულ 21 შეხვედრაში, რომელშიც მან 4 გოლი გაიტანა და რვა პასი გააკეთა.
