20-წლამდელთა საერთაშორისო სერიაში მონაწილეობის მისაღებად, უმცროსი ბორჯღალოსნები ივნისში სამხრეთ აფრიკაში გაემგზავრებიან!
აღსანიშნავია, რომ 3 და 10 ივლისს ბორჯღალოსნები მსოფლიოს ჩემპიონ სამხრეთ აფრიკასთან ორ ტესტ-მატჩს გამართავენ, მანამდე კი, ეს ქვეყნები ერთმანეთს 20-წლამდელთა ნაკრებების დონეზე დაუპირისპირდებიან.
ოთხ გუნდიან საერთაშორისო სერიაში სამხრეთ აფრიკის, საქართველოს, არგენტინის და ურუგვაის ნაკრებები მიიღებენ მონაწილეობას. უმცროსი ბორჯღალოსნები 18 ივნისს არგენტინას ეთამაშებიან, 23-ში ურუგვაის, ხოლო 28 ივნისს მასპინძელ სამხრეთ აფრიკას ეთამაშებიან. ჯგუფში პირველ და მეორე ადგილზე გასული გუნდები 3 ივლისს ფინალში, ხოლო ბოლო ორი მესამე ადგილისთვის ითამაშებენ.
ჯგუფურ ეტაპზე გამარჯვებული გუნდი 4 ქულას მიიღებს, ფრე 2 ქულაა და მოქმედებს ბონუს-სისტემა – 4 და მეტი ლელოს გატანისთვის და 7 და ნაკლები ქულით მარცხისთვის.
უმცროსი ბორჯღალოსნები წლებია სამხრეთ აფრიკაში ტურნირზე დადიან, რაც საქართველოს რაგბის კავშირის სპორტული მიმართულების ვიცე-პრეზიდენტის, ბაჩო ხურციძის განცხადებით, სამხრეთ აფრიკის რაგბის კავშირთან სტრატეგიული თანამშრომლობის ნაწილია:
„ეს უმნიშვნელოვანესი ტურნირია, რადგან ყველა წარმატება, რასაც ამ ასაკში ვაღწევთ, ნაწილობრივ სწორედ მსგავსი მაღალი დონის ტურნირებში მონაწილეობის შედეგია. სამხრეთ აფრიკის რაგბის კავშირთან სტრატეგიული თანამშრომლობის ფარგლებში, ამ ტურნირზე წლებია დავდივართ. გარდა ამისა, ამ ურთიერთობას უკავშირდება ეროვნული გუნდის ტურნე სამხრეთ აფრიკაში და ქართული ფრანჩაიზის შესაძლო ჩართვა სამხრეთ აფრიკულ ჩემპიონატში. მნიშვნელოვანია, რომ ამ ტურნირის ერთ-ერთი მხარდამჭერი და დამფინანსებელი მსოფლიო რაგბია“, – ამბობს ხურციძე.
სამხრეთ აფრიკის 20-წლამდელთა ნაკრების მწვრთნელი ბაფანა ნჰლეკო მოხარულია, რომ მის გუნდს მაღალი დონის შეხვედრების ჩატარების საშუალება აქვს:
„მოხარულები ვართ, რომ 2019 წლის შემდეგ მოედანზე დაბრუნების შესაძლებლობა გვექნება. ეს იყო ურთულესი პერიოდი და ახლა გვექნება შესაძლებლობა ვაჩვენოთ ჩვენი უნარები მაღალი დონის გუნდებთან. მადლობა მსოფლიო რაგბს, რადგან მათ გარეშე ეს ტურნირი ვერ ჩატარდებოდა. მოთამაშეთა განვითარების კუთხით, ის უმნიშვნელოვანესია.
თავდაუზოგავად ვშრომობდით და ეს თამაშები ჩვენთვის დამსახურებული ჯილდოა. სამწუხაროდ, წინა თაობას ამის შესაძლებლობა არ მიეცა. უკანასკნელ წლებში არგენტინა და საქართველო მუდამ დიდ წინააღმდეგობას გვიწევდა და მათგან ახლაც იგივეს ველით. ისინი ფიზიკურ ბრძოლაში გამოირჩევიან, ურუგვაი კი სწრაფი გუნდია. მოუთმენლად ველოდებით მათთან თამაშებს“, – განაცხადა ნჰლეკომ.
მსოფლიო რაგბის თავმჯდომარე ბილ ბომონტს იმედი აქვს რომ 20-წლამდე მორაგბეების ტურნირები მალე აღდგება.
„მოუთმენლად ველოდებით 20-წლამდელთა ტურნირების აღდგენას, რომლებიც პანდემიის გამო ორი წელია ვერ ტარდება. დარწმუნებული ვარ, მსგავსი ტურნირები არაერთი ვარსკვლავის აღმოჩენის შესაძლებლობას მოგვცემს“, – ამბობს ბომონტი.
U20 საერთაშორისო სერია 2021, სამხრეთ აფრიკა, სტელენბოში:
18 ივნისი
საქართველო – არგენტინა
სამხრეთ აფრიკა – ურუგვაი23 ივნისი
ურუგვაი – საქართველო
სამხრეთ აფრიკა – არგენტინა28 ივნისი
სამხრეთ აფრიკა – საქართველო
ურუგვაი – არგენტინა3 ივლისი
მესამე ადგილისთვის
ფინალი
