რევაზ ინჯგია ლიმასოლის „აპოლონმა“ ოფიციალურად წარადგინა და მას 13-ნომრიანი მაისური გადასცა. 20 წლის ნახევარმცველმა კვიპროსული გუნდის ვებ-გვერდთან პირველი კომენტარი გააკეთა.
„ძალიან ბედნიერი ვარ. პირველად მივდივარ საქართველოდან და ეს ჩემთვის გამოწვევაა. ყველაფერს გავიღებ „აპოლონის“ მიზნების მისაღწევად. აქ დიდი ხანია არ ვიმყოფები, მაგრამ ლიმასოლი მშვენიერი და მშვიდი ქალაქია, თანაგუნდელებმა ძალიან კარგად მიმიღეს. თამაში, როგორც ფლანგზე, ისე თავდამსხმელის უკან შემიძლია და ჩემი პლუსი ცარიელ სივრცეებში მოძრაობაა“, – ციტირებს ლიმასოლელთა ვებ-გვერდი ინჯგიას სიტყვებს.
20 წლის შემტევმა ნახევარმცველმა აპოლონთან კონტრაქტი 2023 წლის ზაფხულამდე გააფორმა. ახალგაზრდა ფეხბურთელმა მიმდინარე სეზონი თელავში დაიწყო, რომლის მაისურით 13 მატჩში 1 გოლი გაიტანა. მანამდე ის თბილისის ლოკომოტივში თამაშობდა.
აპოლონში ინჯგია მეორე ქართველი ფეხბურთელია. ლიმასოლელთა რიგებში გიორგი პაპუნაშვილიც თამაშობს. აპოლონი გასულ სეზონში კვიპროსის ჩემპიონატში 54 ქულით მე-3 ადგილზე გავიდა და ჩემპიონ ომონიას მხოლოდ 2 ქულით ჩამორჩა.
