ალბათ ყველამ შეამჩნიეთ ორი დღის წინ კრიშტიანუ რონალდუს საქციელი. საფრანგეთისა და გერმანიის ნაკრებების თამაშამდე, მატჩის წინა პრესკონფერენციაზე პორტუგალიელმა სუპერვარსკვლავმა ბრიფინგის მაგიდიდან „კოკა-კოლას“ ბოთლები გადადგა.
ევროპული მედიის ცნობით, რონალდუს ჟესტის შემდეგ „კოკა-კოლას“ აქციების ფასი 1,6%-ით დაეცა და კომპანიამ 4 მილიარდამდე დოლარი დაკარგა.
ამ ფაქტს დღეს „კოკა-კოლა ბოთლერს ჯორჯიას“ მფლობელი, თემურ ჭყონია გამოეხმაურა და 36 წლის ფეხბურთელი გააკრიტიკა.
„ვითომ რაღაც გააკეთა. მე ვფიქრობ, რომ ხეპრე ფეხბურთელის ჟესტი იყო. ჯერ ერთი, უწესობაა მაშინ, როცა მთელი ჩემპიონატის სპონსორია „კოკა-კოლა“. მეორეც, არაერთი ცნობილი ადამიანი, მათ შორის ელვის პრესლი უკეთებდა რეკლამას „კოკა-კოლას“ და ვინ არის რონალდუ ელვის პრესლისთან? ნული. მისი დიდი გულშემატკივარი არასდროს ვყოფილვარ და ახლა დამთავრებულია მისი საქმე ჩემს თვალში. ვითომ მაგარია. მაგასაც ვნახავთ, ჩემპიონატი რომ დამთავრდება, როგორი მაგარია“,- განაცხადა თემურ ჭყონიამ.
