ივნისის თვეში საქართველოს საფეხბურთო ნაკრებს ორი ამხანაგური მატჩი ელის. ჯვაროსნები 2 ივნისს ჯერ რუმინეთს, შემდეგ კი ნიდერლანდებს სტუმრად გაეჯიბრებიან.
ნაკრების მთავარმა მწვრთელმა ვილი სანიოლიმ 26 კაციანი შემადგენლობა უკვე დაასახელა, დღეს კი სასტუმრო „შერატონ მეტეხი პალასში“ მედიის წარმომადგენლებისთვის პრესკონფერენცია გამართა, სადაც არაერთ საინტერესო საკითხზე გაამახვილა ყურადღება.
მნიშვნელოვანი ამბავია, რომ ნაკრების თავკაცმა მიიღო გადაწყვეტილება თბილისში გადმოსახლდეს, რათა ნაკრები და ზოგადად აქაურობა უკეთ გაიცნოს.
„აქამდე, როდესაც თბილისში ჩამოსვლა მიწევდა სასტუმროში ვცხოვრობდი. ახლა კი, ჩემს ასისტენტებთან ერთად მივიღე გადაწყვეტილება საქართველოში ვიცხოვრო და აქ გადმოვსახლდე.
ძალზედ მნიშვნელოვანია, რომ გავიცნო აქაური კულტურა, ადათ-წესები და ზოგადად ქვეყანა. რაც მთავარია, თბილისში საცხოვრებლად გადმოსვლა ნაკრების კიდევ უკეთ გასაცნობა არის საჭირო და მნიშვნელოვანი. ასე, რომ ამიერიდან აქ ვიცხოვრებ. მადლობა ფეხბურთის ფედერაციას მხარში დგომისთვის და დახმარებისთვის“ – აღნიშნავს ვილი სანიოლი.
