გინდ დაიჯერეთ, გინდ არა. პორტუგალიურ კლუბ „პორტიმონენსეს“ იმდენად კომიკური სიტუაცია შეექმნა, რომ ცოტა არ იყოს მართლაც რთული წარმოსადგენია.
კეისიკუ ჰონდას წარდგენა საფეხბურთო სამყაროს ალბათ არ უნდა სჭირდებოდეს. აი, პორტუგალიელებმა კი მისი მხოლოდ წარდგენა მოასწრეს და მეტი არაფერი.
34 წლის იაპონელი ფეხბურთელი, რომელმაც სახელი „მილანში“ თამაშით გაითქვა და თავისთავად ეროვნული ნაკრებისთვისაც უმნიშვნელოვანესი ფიგურა გახლდათ, „პორტიმონენსესთან“ 6 თვიანი კონტრაქტი გააფორმა, პორტუგალიაშიც ჩაფრინდა, კონტრაქტსაც ხელი მოაწერა, მაგრამ არც მეტი არც ნაკლები, ზუსტად 5 დღეში შინ გამგზავრება მოუხდა. ჰონდას ხელშეკრულება გაუწყვიტეს.
საქმე იმაში გახლავთ, რომ პორტუგალიაში თავისუფალ აგენტებთან მიმართებაში სხვანაირი წესები მოქმედებს. კერძოდ, ამ სტატუსის მატარებელი ფეხბურთელები, რომლებიც პორტუგალიაში ბურთის გორებას ზამთრის სატრანსფერო პერიოდში გადაწყვეტენ, უგუნდოდ აუცილებლად ოქტომბრის შემდეგ უნდა იყვნენ დარჩენილები.
„პორტიმონენსეს“ კი ეს დეტალი გამორჩა და თავადაც შერცხვნენ და ჰონდაც უხერხულ მდგომარეობაში ჩააგდეს. იაპონელი ფეხბურთელის ბოლოს ბრაზილიურ „ბოტაფოგოში“ თამაშობდა, რომელიც შარშან დეკემბერში დატოვა.
ასე რომ, ჩვენი ქვეყნის უმშვენიერეს კუთხე გურიაში გავრცელებული ცნობილი ხუმრობის – „მოხვედი? როის მიხვალ“? არ იყოს, კეისიკუ ჰონდასაც პორტუგალიაში იგივე შეემთხვა.
