უკრაინაში მოღვაწე ვეტერან ქართველ ძიუდოისტს, გიორგი ზანთარაიას დახმარება სჭირდება. ამის შესახებ ინფორმაციას გერმანიის ბუნდესლიგის ძიუდოისტთა კლუბი „აბენსბურგი“ ავრცელებს:
„გიორგი ზანთარაიას ესაჭიროება ჩვენი დახმარება! ძვირფასო ძიუდოისტებო, აბესბურგელებო, უკრაინაში განვითარებულმა ბოლოდროინდელმა მოვლენებმა ყველა ძალიან შეგვძრა და გაგვაოგნა. იმედი გვაქვს, რომ ეს სასტიკი ომი მალე დასრულდება! ზუსტად ამ წუთებში, ჩვენი გუნდის სპორტსმენი, გიორგი ზანთარაიც შუა კიევშია. დღეს მან დახმარების ზარით მოგვმართა, თავისი მდგომარეობა აღგვიწერა და დახმარება გვთხოვა. გვინდა დავიწყოთ მისი დახმარების აქცია. მან ჩამოგვიწერა სია, რაშიც დახმარება ესაჭიროება, ესენია – მედიკამენტები, საკვები, ჰიგიენური საშუალებები, საბნები, საძილე ტომრები, ქურთუკები, ფეხსაცმელი, საბავშვო ტანსაცმელი და სათამაშოები.
მსურველებს ყველა ნივთის მოტანა ჩვენს ძიუდოს დარბაზში შეგეძლებათ. ამასთან, გეტყვით, რომ ყველა მხარდაჭერი, რომელიც ამ დახმარებაში შეიტანს წვლილს, 26 მარტს ბუნდესლიგაში ჩვენი კლუბის მატჩს უფასოდ დაესწრება“, – ნათქვამია „აბენსბურგის“ განცხადებაში.
შეგახსენებთ, რომ გიორგი ზანთარაია საქართველოშია დაბადებული და მრავალი წელია უკრაინაში მოღვაწეობს. მას უკრაინის სახელით არაერთი ტიტული აქვს მოპოვებული, ახლა კი კიევის რადას წევრია. რამდენიმე დღის წინ, 34 წლის სპორტსმენმა ავტომატით გადაღებული სურათიც გაავრცელა, წარწერით – „კიევში ვარ და ვიდგები ბოლომდე“.