ზედიზედ 11 წაგებული მატჩის შემდეგ, მიჯრით ორი მოგება, თუნდაც მეტ-ნაკლებად დაბალი კატეგორიის ტურნირზე და შედარებით უსახელო მეტოქეებთან გულს მაინც სასიამოვნოდ აძგერებს.
ნიკოლოზ ბასილაშვილი ანტალიის 250-იანი კატეგორიის ტურნირის მეოთხედფინალშია. ქართველმა ჩოგბურთელმა, მეორე წრეში, თურქი ალთუგ ცელიკბილეკი ორ სეტში – 7:6, 6:4 დაამარცხა და საუკეთესო რვაში შეაღწია. მართალია, მეტოქე დიდი ვერაფერი ხვითო იყო, რეიტინგის 309-ე ნომერია და წესით უფრო მარტივადაც უნდა მოეგო, მაგრამ ამ შემთხვევაში მთავარი მაინც შედეგია. თან როგორც იტყვიან, გამარჯვებულებს არ ასამართლებენ.
ნახევარფინალში გადასასვლელად, ნიკოლოზ ბასილაშვილს უკვე სერიოზული გამოცდა ელის. ალექს დე მინაურთან ხუმრობა არ შეიძლება. ახალგაზრდა ავსტრალიელ მეჩოგნეს არაერთხელ დაუმტკიცებია, რომ კერკეტი კაკალია და ხანდახან ტოპებიც კი გაუმწარებია. თან ისიც ვთქვათ, რომ ბასილაშვილის მომავალ მეტოქეს, მეოთხედფინალში მოსასვლელად ბულგარელი ანდრეევის და ტუნისელი ჯაზირის სახით გაცილებით რთული ბარიერების გადალახვა მოუხდა, ვიდრე ჩვენებურს.
ნიკოლოზ ბასილასილი ანტალიის ტურნირზე მე-6 ნომრად არის განთესილი, ალექს დე მინაურს კი, რომელიც მსოფლიოს 23-ე ჩოგანია ორგანიზატორებმა მე-4 განთესვა მიაკუთვნეს.
ნიკოლოზ ბასილაშვილის და ალექს დე მინაურის დაპირისპირება 11 იანვარს გაიმართება.
