ვერც მოიგო და არც წააგო. ტომას ტუხელი დებიუტმა „ჩელსის“ მთავარი მწვრთნელის რანგში ამ გუნდის ქომაგებს ალბათ ორმაგი განცდა დაუტოვა. ფრე 0:0 – ასეთი გამოდგა გერმანელი სპეციალისტის სასტარო მატჩი პრემიერლიგაში. არისტოკრატები საკუთარ მოედანზე „ვულვზს“ დაუზავდნენ.
ტომას ტუხელმა მატჩის შემდეგ იმედიანი კომენტარი გააკეთა და აღნიშნა, რომ მისი გუნდით კმაყოფილია.
„მიუხედავად იმისა, რომ 3 ქულა ვერ ავიღეთ, მაინც დიდი სიამოვნება მივიღე. პირველ რიგში პრემიერლიგით. ეს მართლაც საუკეთესო ტურნირია ევროპაში.
რაც შეეხება უშუალოდ მატჩს, თამაშის ხარისხით კმაყოფილი ვარ. ფეხბურთელებმაც მაქსიმუმი გაიღეს. ვფიქრობ ორგანიზებული გუნდის შთაბეჭდილება დავტოვეთ. მოგებას ნამდვილად ვიმსახურებდით, განსაკუთრებით მეორე ტაიმში. არაერთი შანსი გვქონდა, მაგრამ ვერ გამოვიყენეთ.
მომავალს იმედიანად შევცქერი. ამ მატჩმა კარგი წინათგრძნობა დამიტოვა“ – ამბობს ტომას ტუხელი.
