11 ივლისიდან საფეხბურთო კლუბმა “თელავმა” ჩემპიონატისთვის სამზადისი განაახლა, 16 ივლისს კი პირველი ამხანაგური მატჩიც გამართა. თელაველთა მეტოქე საქართველოში შეკრებაზე მყოფი სომხეთის პრემიერლიგის მეხუთეადგილოსანი “არარატ არმენია” გახლდათ. შეხვედრა დიღმის ოლიმპიურ ცენტრში გაიმართა და თელაველთა გამარჯვებით 1:0 დასრულდა, ერთადერთი გოლი იმედა აშორტიამ გაიტანა.
კახური გუნდის მთავარმა მწვრთნელმა გიორგი მიქაძემ ბევრ ფეხბურთელს მისცა თავის გამოჩენის შესაძლებლობა. “თელავმა” ტაიმები შერეული შემადგენლობით ითამაშა. საბოლოო ჯამში, თელაველებმა ლეგიონერებით გადავსებულ სომხურ კლუბს არაფერი დაუთმეს და დამსახურებულადაც გაიმარჯვეს.
