როგორც ვიცით, საქართველოს მორაგბეთა ეროვნული ნაკრები ივლისში სამხრეთ აფრიკის ნაკრებს ორ ტესტ-მატჩში დაუპირისპირდება. ეს ქართული რაგბისთვის ნამდვილად დიდი მიღწევაა, რადგან „ბორჯღალოსნები“ მსოფლიო ჩემპიონებს აქამდე მხოლოდ მსოფლიო თასზე თუ შეხვდებოდნენ.
ამასთან დაკავშირებით, საქართველოს ნაკრების კაპიტანი რაგბის კავშირის პრესცენტრს ესაუბრა და შთაბეჭდილებები გაუზიარა:
„სერიოზული გამოცდა და გამოწვევა გველის. მსოფლიოს ჩემპიონთან ორი მატჩი და ტიერ1-ის გუნდის მასპინძლობა, სიხარულთან ერთად დიდი გამოწვევაცაა. ორივე დიდი გუნდია და გვსურს მათთან კარგი თამაშით ჩვენც გავიხაროთ და გულშემატკივარიც გავახაროთ. თქმაც არ უნდა, რომ ამ თამაშებში ბოლომდე დავიხარჯებით და ვნახოთ რა შედეგი გვექნება.
ასეთი ხანგრძლივი პაუზის შემდეგ, მსოფლიოს ჩემპიონთან პირველი თამაშების გამართვის პატივი გვერგო, რაც მოლოდინს კიდევ უფრო ამწვავებს. გულშემატკივარი მოუთმენლად ელოდება სამხრეთ აფრიკის პირველ თამაშს და როდესაც ქომაგი განსაკუთრებულის მოლოდინშია, სპორტსმენი შესაძლებლობის მაქსიმუმს აჩვენებს. აფრიკელები მოტივირებული დაგვხვდებიან, ეცდებიან გულშემატკივარი გაახარონ და სერიოზულ ბრძოლას შემოგვთავაზებენ.
„საქართველოს ამ დონის ტესტ-მატჩები აქამდე არასდროს ჰქონია. სასიხარულოა, რომ შოტლანდიამ კიდევ ერთხელ ისურვა ჩვენთან სტუმრობა და აფრიკელებმა, ბრიტანელ და ირლანდიელ ლომებთან შეხვედრების წინ, საქართველოსთან თამაში პროდუქტიულად მიიჩნიეს. ვფიქრობ, ეს ნებისმიერ ქართველს უნდა უხაროდეს“, – ციტირებს მერაბ შარიქაძის სიტყვებს RUGBY.GE.
საგულისხმოა ისიც, რომ სამხრეთ აფრიკას 2019 წლის მსოფლიო თასის ფინალის შემდეგ არ უთამაშია და „სპრინბოქსს“ პირველი თამაშები სწორედ „ბორჯღალოსნებთან“ ელის.
ზაფხულის ტესტ-მატჩებამდე ბორჯღალოსნები 26 ივნისს 2021 წლის რაგბი ევროპის ჩემპიონატის დასკვნით მატჩს გამართავენ და შინ ბელგიასა და ნიდერლანდებს შორის გამარჯვებულს (მატჩი 29 მაისს გაიმართება) მიიღებენ.
აფრიკიდან შინ მობრუნებული საქართველო კი 17 ივლისს შოტლანდიას უმასპინძლებს და ჯამში, ზაფხულში, ტიერ1-ის გუნდებთან სამი ტესტ-მატჩი გამოგვივა, რისი მსგავსიც აქამდე ზაფხულის ტესტებზე არასდროს ყოფილა.
