18-20 თებერვალს, ისრაელის ქალაქ თელ-ავივში ძიუდოს გრან-პრის გათამაშება გაიმართება, რომელშიც სხვა არაერთი ქვეყნის კიმონოისტებთან ერთად საქართველოს ნაკრებიც იასპარეზებს.
ძიუდოს მოყვარულთ ეცოდინებათ, რომ სპორტის ამ სახეობაში 2021 წლის სეზონი დოჰას მასტერსით დაიწყო, სადაც ლაშა გუჯეჯიანის შეგირდებმა დამაჯერებლად იასპარეზეს და შინ ორი ჩემპიონითაც დაბრუნდნენ. ყატარის დედაქალაქში გაშლილ ტატამზე ოქროს მედლები ტატო გრიგალაშვილმა და ვარლამ ლიპარტელიანმა მოიპოვეს.
სამწვრთნელო შტაბის გადაწყვეტილებით თელ-ავივის გრან-პრიზე არცერთი მათგანი არ იჭიდავებს და ჩვენი გუნდიც ოდნავ გადახალისებული შემადგენლობით წარდგება. ნიშანდობლივია, რომ დიდების ნაკრებში დებიუტი ექნებათ გიორგი ბაზანდარაშვილს, ვლადიმერ ახალკაცს და ილია სულამანიძეს.
საქართველოს ნაკრები ისრაელში შემდეგი შემადგენლობით იასპარეზებს:
-60 კგ: ამირან პაპინაშვილი, თემურ ნოზაძე
-66 კგ: ბაგრატ ნინიაშვილი, გიორგი ბაზანდარაშვილი
-73 კგ: ლაშა შავდათუაშვილი, ბაჩო (ნუგზარ) ტატალაშვილი
-81 კგ: ლუკა მაისურაძე, ვლადიმერ ახალკაცი
-90 კგ: ბექა ღვინიაშვილი, ლაშა ბექაური
-100 კგ: ილია სულამანიძე, ონისე სანებლიძე
+100 კგ: გურამ თუშიშვილი, გელა ზაალიშვილი.
