ამერიკულმა ვებ-გვერდმა Behindthebuckpass-მა „მილუოკ ბაქსის“ 6 საუკეთესო მეპასე დაასახელა, რომელთა შორის NBA-ს კლუბის ქართველი ახალწვეული სანდრო მამუკელაშვილიც მოხვდა.
„ვფიქრობთ, რომ ამ ჩამონათვალში მამუკელაშვილი უფრო მაღალ პოზიციაზე ყოფნასაც იმსახურებს, თუმცა, ვინაიდან მას NBA-ში ჯერაც არ უთამაშია, მოვერიდეთ, ბაქსის გამოცდილი მოთამაშეების ზემოთ დაგვეყენებინა. კოლეჯების ლიგის ბოლო სეზონში სანდროს შეტევაში დიდი როლი დაეკისრა და შედეგიან პასებშიც დიდი პროგრესი ჰქონდა. მისი საშუალო სარგებლიანობის კოფიციენტმა 4%-ით მოიმატა, პასებში კი წინსვლა უფრო თვალსაჩინო იყო.
მისი სხეულის გათვალისწინებით, მამუკელაშვილის თამაშის სტილი ნამდვილად უნიკალურია და პასის კულტურას მასში დიდი როლი უკავია. საზაფხულო ლიგაში ამ მხრივ სანდროს შესაძლებლობები ნაწილობრივ ვიხილეთ და ეს, ნამდვილად ამაღელვებელი იყო. უდავოა, რომ საუკეთესო მეპასეთა რეიტინგშიც დაწინაურდება“, – წერს ამერიკული ვებ-გვერდი.
შეგახსენებთ, რომ მილუოკი „ბაქსმა“ სანდრო მამუკელაშვილს 2-წლიანი კონტრაქტი გაუფორმა, რომლის თანახმადაც ის სეზონში 50 დღე მილუოკის რიგებში იქნება, დანარჩენი დრო კი G ლიგაში.
