რონალდ კუმანი: ჩემპიონობა? მოდით ვიყოთ რეალისტები…

ცუდი დროება უდგას „ბარსელონას“. კატალონიური გრანდი საკუთარ თავს აშკარად არ ჰგავს, რაც ესპანეთის ჩემპიონატის მიმდინარე სეზონში თვალნათლივ ჩანს. მე-15 ტურში, კუმანის შეგირდებმა შინაურ კედლებში „ეიბართან“ ფრედ 1:1 ითამაშეს და მნიშვნელოვანი ქულები დაკარგეს.

ნიშანდობლივია, რომ „ბარსელონამ“ 17 წლის წინანდელი ანტირეკორდი გაიმეორა. ამჟამად , 15 ტურის შემდეგ კატალონიელებს აქტივში 25 ქულა აქვთ, რაც 2003-2004 წლების სეზონის შემდეგ ყველაზე ცუდი მაჩვენებელია. იმ წლებში „ბარსელონას“ ფრენკ რაიკაარდი წრთვნიდა, თუმცა მიუხედავად არასახარბიელო სტარტისა, ესპანურმა გრანდმა ჩემპიონატი მეორე ადგილზე დაასრულა.

ბუნებრივია, „ეიბართან“ ფრით უკმაყოფილო იყო რონალდ კუმანი:

„მოგებას ვიმსახურებდით და ამისთის ყველაფერი გავაკეთეთ. არაერთი საგოლე მომენტი შევქმენით, პლუს პენალტიც ვერ გამოვიყენეთ, მათ კი მხოლოდ ერთი შანსი მიეცათ. თითქოს ყველაფერი გეგმის მიხედვით მიდიოდა. გუნდი კარგად გამოიყურებოდა და გამარჯვებისკენაც მივიწევდით, თუმცა… ასეთი რამ სამმწუხაროდ პირველად არ გვემართება.

დიახ, გოლი უხეში შეცდომის გამო მივიღეთ, თუმცა ამის გამო არავის დადანაშაულებას არ ვაპირებ. ფეხბურთში შეცდომები ხდება და ეს ნებისმიერს შეიძლება დამართვნოდა. 

ჩემპიონობა? რეალისტები უნდა ვიყოთ. ამ სეზონში პირველ ადგილზე გასვლა მარტივი არ იქნება“ – ამბობს „ბარსელონას“ ნიდერლანდელი დამრიგებელი.