მისი უდიდებულესობა, ჩემპიონთა ლიგა დაბრუნდა და თანაც როგორ. პლეიოფის ორი სუპერმატჩით, მაგრამ ორივე შემთხვევაში მოულოდნელი შედეგით.
განსაკუთრებით სენსაციური ანგარიში დაფიქსირდა „ნოუ კამპზე“, სადაც ერთმანეთს „ბარსელონა“ და „პსჟ“ დაუპირისპირდნენ. არა გვგონია ის ანგარიში, რაც კატალონიის დედაქალაქში დაფიქსირდა გუნდების ძალთა თანაფარდობას რეალირად ასახავდეს, მაგრამ ეს ფეხბურთია. ხდება ხოლმე, როდესაც ერთი გრანდი მეორეს პირწმინდათ ჩაგრავს.
ასე მოხდა ამჯერადაც. „ბლაუგრანა“ საკუთარ მოედანზე პარიზულ გრანდთან 1:4 შერცხვა.
ბუნებრივია, ნირწამხდარი იყო „ბარსელონას“ დამრიგებელი რონალდ კუმანი.
„პირველ ტაიმში მეტ-ნაკლებად არა გვიშავდა. დავწინაურდით და ანგარიშიც გაზრდაც შეგვეძლო, მაგრამ მოხდა პირიქით. მეტოქემ საპასუხო გოლი სწრაფად გაგვიტანა და აშკარად გამოჩნდა, რომ ფიზიკური კონდიციების მხრივ პსჟ-მ დაგვჩაგრა.
დღევანდელმა დაპირისპირებამ გამოაჩინა, რომ მოწინააღმდეგე ჩვენზე უკეთ იყო მზად. სხვა გზა არ არის, უნდა ვაღიაროთ, რომ პსჟ ჩვენზე ძლიერი იყო. კონკრეტულ ასპექტებზე მუშაობა უნდა გავაგრძელოთ.
საკუთარ მოედანზე ასეთი ანგარიშით წაგების შემდეგ მომდევნო ეტაპზე გასვლა თითქმის წარმოუდგენელია. ამ მარცხმა ბევრი რამ უნდა გვასწავლოს და გაკვეთილად გამოვიყენოთ.“ აღნიშნავს რონალდ კუმანი.
