ევროპა ლიგის 1/8 ფინალური ეტაპის განმეორებით დაპირისპირებაში „რეინჯერსმა“ შინაურ კედლებში პრაღის „სლავიასთან“ 0:2 წააგო და ტურნირს გამოეთიშა. ისე ცოტა მოულოდნელი შედეგი კი არის, რადგან შოტლანდიური გუნდი წყვილის ფავორიტად მოიაზრებოდა და პირველი მატჩის შემდეგაც კომფორტულად გრძნობდა თავს, რადგან პრაღაში ფრედ 1:1 ითამაშა.
წაგება წაგებად და „რეინჯერსისთვის“ სხვა უსიამოვნო იცნიდენტსაც ჰქონდა ადგილი. როგორც ირკვევა, გლაზგოელთა ერთ-ერთ ფეხბურთელს გლენ კამარას რასისტული შინაარსის შეურაცხყოფა მიაყენეს და ეს „სლავიას“ მოთამაშე ონდრჟეი კუდელამ გააკეთაო. ამის შესახებ „რეინჯერსის“ მთავარი მწვრთნელი სტივენ ჯერარდი საუბრობს.
„ძალიან გაბრაზებული ვარ. გლენს კარგად ვიცნობ და მას ვენდობი. ბოლომდე დარწმუნებული ვარ, რომ მისი ბრალდებები სიმართლეს შეესაბამება.
შეურაცხმყოფელი შეძახილები იქვე მყოფმა სხვა თანაგუნდელებმაც გაიგეს და ვამაყობ, რომ მათ სოლიდარობა გამოიჩინეს. უეფა უკვე საქმის კურსშია და ვიმედოვნებ, რომ უყურადღებოდ არ დატოვებენ“ – აღნიშნავს „რეინჯერსის“ მთავარი მწვრთნელი.
ამასობაში, ჩეხური პრესა იუწყება, რომ „სლავიას“ ფეხბურთელს კუდელას გასახდელისკენ მიმავალ გვირაბში შოტლანდიური გუნდის წევრები დაესხნენ თავს და მასზე ფიზიკურად იძალადეს.
