მადრიდის „ატლეტიკო“ აღარ ხუმრობს. დიეგო სიმეონეს გუნდი ლა-ლიგას დამაჯერებლად ლიდერობს და ჩემპიონობას უმიზნებს. მადრიდულმა გუნდმა მიმდინარე სეზონში „ბარსელონადან“ ლუის სუარესი გადმოიბირა და ისიც ქომაგების იმედებს ამართლებს.
ლა-ლიგის მორიგ ტურში როხიბლანკომ „ვალენსიას“ უმასპინძლა და 3:1 დაამარცხა. მეორე გოლი „ღამურების“ კარში სწორედ ურუგვაელმა ფორვარდმა გაიტანა, როდესაც ანგარიში საყაიმო იყო.
„ატლეტიკოს“ პრეზიდენტი ენრიკე სერესო ლუის სუარესით აღფრთოვანებულია და მისი მისამართით საქებარ სიტყვებს არ იშურებს. ის ასევე საჩემპიონო შანსებსაც აფასებს.
„ ჩემპიონობაზე ფიქრი ნაადრევია. ჯერ სეზონის შუაგულია და წინასწარ ეიფორიას არ უნდა მივეცეთ. კი, სატურნირო ცხრილში პირველ ადგილზე ვართ, მაგრამ წინ კიდევ არაერთი მატჩია.
როდესაც ჩემპიონატის ბოლომდე 3 ტური იქნება დარჩენილი და ისევ ლიდერები ვიქნებით, მაშინ შესაძლოა გავრისკო და წინასწარ ვთქვა, რომ ტიტული ჩვენია. საკმაოდ კარგი გუნდი გვყავს. თითოეულმა ფეხბურთელმა იცის მოედანზე რა უნდა გააკეთოს.
რაც შეეხება ლუის სუარესს, მე ყოველთვის მჯეროდა, რომ ის მსოფლიოს ერთ-ერთი საუკეთესო ფორვარდია. გაგვიმართლა, რომ დღეს ლუისი ჩვენი ფეხბურთელია“ – ამბობს „ატლეტიკოს“ პრეზიდენტი.
