ის უდავოდ ექსტრავაგანტულ მეკარეთა კატეგორიას განეკუთვნებოდა, რომელიც ჩარჩოებში მოქცეული არ იყო. საკუთარ საჯარიმოში თავისუფლად და თამამად მოქმედება და არც მისი ვიზავის ტერიტორიაზე ჩადიოდა იშვიათად. ის იყო მეკარე, რომელიც ხშირად ურტყამდა პენალტებს.
ხოსე ლუის ჩილავერტი – პარაგვაელი გოლკიპერი, რომელსაც ევროპულ გრანდებში არ უთამაშია, თუმცა ნაკრებიდან უამრავ გულშემატკივარს დაამახსოვრა თავი. ევროპული გუნდებიდან კი მის რეზიუმეში ესპანურ „სარაგოსას“ და ფრანგულ „სტრასბურგს“ ამოვიკითხავთ.
რა გაგვახსენა ჩილავერტი? იმან, რომ ის მორიგი პენალტის დასარტყმელად ემზადება. ამჯერად უკვე პარაგვაის ხელისუფლების კარში. „მე ყოველთვის ვამაყობდი, რომ პარაგვაელი ვარ. წინ ქვეყნის პრეზიდენტობისთვის“ – წერს ჩილა სოციალურ ქსელში და აანონსებს, რომ ქვეყნის საპრეზიდენტო არჩევნებში აპირებს ჩართვას.
55 წლის ყოფილი ფეხბურთელი მთავარ გამოწვევად კორუფციის აღმოფხვრას თვლის და მოსახლეობას ჰპირდება, რომ ბოლომდე იბრძოლებს ამ მანკიერების დასაძლევად. ის დარწმუნებულია, რომ ხალხს უყვარს და არჩევნებში გამარჯვების კარგი შანსი აქვს.
ხოსე ლუის ჩილავერტი ფიფამ სამჯერ – 1995, 1997 და 1998 წლებში დაასახელა საუკეთესო მეკარედ.
