საქართველოს ეროვნული ნაკრების მთავარმა მწვრთნელმა ვილი სანიოლმა საბერძნეთთან მატჩის წინ პრესკონფერენცია გამართა.
სანიოლთან ერთად პრესკონფერენციაზე საქართველოს ნაკრებისა და პოლონური “კრაკოვიას” მცველმს ოთარ კაკაბაძემ ისაუბრა.
ოთარ კაკაბაძე:
“ჩემთვის ეროვნულ ნაკრებში ყოველი გამოძახება მნიშვნელოვანია, მაგრამ კლუბში ბოლო მატჩში გატანილი გოლის შემდეგ შეიძლება უფრო მნიშვნელოვანი იყოს, რადგან უფრო თავდაჯერებული ჩამოვედი და შეიძლება ეს უფრო დამეხმაროს.
ყველა ძალიან უკმაყოფილო იყო წინა მატჩებით და ყველას გვესმის, რომ მეტი არის საჭირო და მეტი გვინდა. ბევრი პრობლემა გვქონდა, მათ შორის ტრავმებიც, მაგრამ ამ მხრივ, ახლა ბევრად უკეთესი მდგომარეობა გვაქვს. განსაკუთრებულია ის ფაქტი, რომ პირველად ვითამაშებთ ბათუმში მაყურებლების წინაშე და ძალიან მოტივირებული, მონდომებული ვართ. გვინდა, რომ გამოვასწოროთ ის თამაში, რაც სექტემბერში ვაჩვენეთ”, – განაცხადა კაკაბაძემ.
