სექტემბერში, ჩემპიონთა ლიგის წილისყრის შემდეგ, ბევრმა ეს ჯგუფი სიკვდილისად შერაცხა. არც გაემტყუნებოდათ. „პსჟ“, თუნდაც ისეთი ყოჩაღი ვერა, მაგრამ მაინც „მანჩესტერ იუნაიტედი“ და საკმაოდ ბრძოლისუნარიანი „ლაიპციგი“. თავიდანვე განწირული იყოო ვერავინ იტყვის, მაგრამ პლეიოფში გასვლას მაინც ფრანგულ-ინგლისურ გრანდებს უწინასწარმეტყველებდნენ, თუმცა „ლაიპციგსაც“ სიფრთხილით უდგებოდნენ.
საბოლოოდ კი გამოჩნდა, რომ გერმანული გუნდი ხელწამოსაკრავი არავისთვის იქნებოდა და აგერ ტიტულოვანი „მანჩესტერ იუნაიტედიც“ ჯგუფში ჩატოვა. ენა არავის მოუბრუნდება თქვას, „ლაიპციგმა“ ეს არ დაიმსახურაო, რომლებმაც ჯგუფის დასკვნით დაპირისპირებაში უშუალო კონკურენტი შინაურ კედლებში 3:2 დაამარცხეს. რა თქმა უნდა, გახარებულია გუნდის ახალგაზრდა სპეციალისტი იულიან ნაგელსმანიც:
„მატჩს დაძაბული და საკმაოდ სანერვიულო ფინიში ჰქონდა. უცებ კინაღამ ყველაფერი წყალში ჩაგვეყარა, მაგრამ ბედნიერი ვარ, რომ დასახულ მიზანს მივაღწიეთ. მატჩის დიდი მონაკვეთი უმაღლეს დონეზე ჩავატარეთ, რაც ანგარიშშიც აისახა. ჩემმა ფეხბურთელებმა გეგმა პირნათლად შეასრულეს. განსაკუთრებით ეს პირველ ტაიმში იგრძნობოდა.
მატჩამდე, გასახდელში ბიჭებს ვუთხარი, რომ ისინი დღეს არა ადამიანები, არამედ მანქანები უნდა ყოფილიყვნენ და ასეც მოხდა. ისინი ბოლო წამამდე მთელი ძალით იბრძოდნენ და შრომაც დაუფასდათ. ჩვენ დიდ გუნდს მოვუგეთ. ჩემპიონთა ლიგაზე თავგადასავალი გრძელდება“ – ასეთი იყო „მანჩესტერ იუნაიტედთან“ გამარჯვების შემდეგ, „ლაიპციგის“ ნიჭიერი მთავარი მწვრთნელის კომენტარი ჟურნალისტებთან.
