ჩოგბურთის მოყვარულთ ეცოდინებათ, რომ სამეფო სპორტში შარშან მეტად მნიშვნელოვანი სანაკრებო ტურნირი გაჩნდა, რომელიც დევისის თასისგან განსხვავებულია, თუმცა მეტად პრესტიჟულია და იქ გამარჯვება უმნიშვნელო არავისთვის არის.
შეჯიბრის დონესა და მნიშვნელობაზე ისიც მეტყველებს, რომ მასში არცერთი ტოპ კლასის ჩოგბურთელი არ თაკილობს მონაწილეობას. ასე იყო შარშანაც, როდესაც ჩემპიონი ნოვაკ ჯოკოვიჩის სერბეთის ნაკრები გახდა. ნიშანდობლივია, რომ 2020 წლის ATP თასის გათამაშებაში საქართველოს ნაკრებიც მონაწილეობდა, თუმცა მაშინ ტურნირში 24 ქვეყნის ნაკრები თამაშობდა, წლეულს კი რაოდენობა განახევრდა და მელბურნში 12 გუნდმა მოიყარა თავი.
სერბეთის ნაკრებმა ტიტულის შენარჩუნება ვერ შეძლო. ნოლე და კომპანია საერთოდ ჯგუფში ჩარჩა, რაც დიდი მოულოდნელობა იყო. ტურნირს გამოკვეთილი ფავორიტი არ ჰყავდა, რადგან ვერავინ იწინასწარმეტყველებდა შეჯიბრს რაფაელ ნადალის ესპანეთი, ალექსანდრე ზვერევის გერმანია, იგივე ჯოკოვიჩის სერბეთი თუ ვინ მოიგებდა.
მოხდა ისე, რომ ATP თასის მეორე გამარჯვებული რუსეთის ნაკრები გახდა. დანილ მედვედევმა და ანდრეი რუბლევმა უმაღლეს დონეზე ითამაშეს და შეიძლება ითქვას, რომ ჩემპიონობაც დამსახურებულად მოიპოვეს. რუსეთის გუნდმა ჯგუფში არგენტინის და იაპონიის ნაკრებებს მოუგო, ნახევარფინალში გერმანიას აჯობა, ხოლო ფინალში იტალიის ნაკრები დაჯაბნა.
